Empreza hosi Dubai sei lansa produtu bee-hemu iha Aileu
DILI, 22 fevereiru 2022 (TATOLI)—Empreza Leste Food and Beverage, S.A hosi Dubai sei halo lansamentu produtu bee-hemu foun iha Timor-Leste ho marka Leste Water, ne’ebé lokaliza iha Laulara, munisípiu Aileu.
“Empreza ne’e nia sede iha Dubai, enkuantu prosesu konstrusaun atinje ona 90% ona, bazeia ba ami-nia monitorizasaun foin lalais,” Diretór Ezekutivu TradeInvest iha Timor-Leste, Arcanjo da Silva, informa ba Agência TATOLI, iha ninia knaar fatin, Colmera, tersa ne’e.
Antes ne’e, empreza Leste Food and Beverage, S.A hetan ona sertifikadu investimentu hosi TradeInvest iha tinan 2020, ho totál investimentu millaun $3,5, ne’ebé tuir planu sei investe to’o tinan 2028.
Notísia relevante: Timor-Leste tama lista fa’an produtu iha Pos-Expo Dubai
Tuir direjente ne’e, ho prezensa produtu Leste Water bele aumenta tan ona ezisténsia produtu bee-hemu iha Timor-Leste, hanesan mós produtu rua seluk hanesan GOTA no Fresca, ne’ebé TradeInvest atribui ona sertifikadu investidór.
Alende ne’e, empreza Leste Food and Beverage, S.A ne’ebé xefia hosi Mohammad Ali Mirza, halo ona promosaun iha Timor-Leste inklui produtu Timór nian durante Expo Dubai 2022 hodi atrai tan investidór sira seluk mai Timór iha setór produtivu no setor sira seluk.
Jornalista : Antónia Gusmão
Editora : Julia Chatarina
