DILI, 22 fevereiru 2022 (TATOLI)-Prezidente Repúblika, Francisco Guterres Lú Olo, iha tempu besik sei nomea komandante komponente tolu iha Instituisaun FALINTIL-FDTL hafoin finaliza estudu ba proposta ezonerasaun no nomeasaun ne’ebé simu ona husi Governu foinlalais.
Xefe Casa Militár, Prezidensia Repúblika, Koronel, António da Silva ‘Maukalu’,informa reuniaun Konsellu Superiór Defeza no Seguransa (KSDS), tersa ne’e, hodi diskute kona-ba proposta ezonerasaun no nomeasaun ne’ebé maka aprezenta ona husi Governu Konstituisaun daualu.
Notísia Relevante :Governu aprova proposta ezonerasaun no nomeasaun kargu xefia F-FDTL
Tuir proposta Governu nian ne’ebé maka Xefe Estadu simu atu nomea komandante komponente terrestre foun Koronel José da Costa, Komponente Navál, Postu Komodoru, Higinio das Neves, no Komandante ba komponente Áero, Tenente Koronel Helder da Costa.
Komandante komponente tolu ne’e, sira-nia mandatu remata ona nune’e presiza atu ezonera hodi halo nomeasaun foun.
“Tuir lei ezonerasaun no noemasaun fó kompeténsia ba Prezidente Repúblika nune’e konsulta uluk hanoin husi KSDS,’’Nia hateten iha Palásiu Prezidensiál Nicolau Lobato, Bairru Pite, tersa ne’e.
Durante diskusaun ne’e, Xefe Estadu seidauk foti desizaun ruma kona-ba pedidu Governu nian ne’e, tanba sei hala’o prosesu verifikasaun tuir prosedimentu legal.
Maibé Prezidente Repúblika promete sei foti desizaun iha tempu besik hodi nomea komandante na’in-tolu ne’e hodi serbí instituisaun F-FDTL.
Entertantu, membru KSDS ne’ebé partisipa iha enkontru ne’e mak Primeiru Ministru, Taur Matan Ruak, Ministru Defeza, Filomeno Paixão de Jesus, Ministru Justisa, Manuel Cárceres da Costa, Xefe Estadu Maiór Jenerál F-FDTL, Tenente Jenerál, Falur Rate Laek, Komandante Jerál PNTL, Komisáriu, Faustino da Silva no seluk tan.
Jornalista:Nelson de Sousa
Editór :Agapito dos Santos
