RAEOA rejista pasiente kazu dengue na’in-rua
OÉ-CUSSE, 22 fevereiru 2022 (TATOLI) – Dadus hosi Diresaun Servisu Saúde Rejiaun Administrativa Espesiál Oé-Cusse Ambeno (RAEOA), iha Hospitál Referénsia Oé-Cusse (HRO) rejista pasiente dengue ne’ebé baixa hela iha sala pediátria hamutuk rua no na’in-haat alta ona.
Tán ne’e iha loron tersa ne’e, Prezidente Autoridade RAEOA, Arsénio Paixão Bano, hala’o vizita kortejia ba HRO, hodi enkoraja pasiente sira atu koopera ho fasilidade saúde nune’e bele hetan aisténsia saúde, tanba tuir estoke ai-moruk iha armazein sei sufisiente hodi halo tratamentu ba pasiente ne’ebé sofre dengue.
Iha vizita traballu ne’e, ezekutivu ne’e husu ba profisionál saúde sira atu hatudu disiplina hodi fó atendimentu ba pasiente sira, tanba tuir dadus hosi Ministériu Saúde, pasiente na’in-30 lakon ona vida tanba kazu dengue.
“Kazu dengue agora daudaun Hospitál Referénsia Oé-Cusse rejista, hamutuk kazu neen (6), hosi númeru ne’e iha kazu rua mak sai suspeitu, kazu haat ne’e dianóstiku pozitivu dengue, entaun hosi kazu hirak-ne’e iha pasiente na’in-haat (4) alta tiha ona no baixa iha sala pediátria hamutuk kazu rua (2), ida suspeitu ida fali pozitivu ho dengue,” Diretora klínika Hospitál Referénsia Oé-Cusse, Agnes Bene Bana, informa ba Agência Tatoli iha Oé-Cusse.
Nia esplika, impaktu hosi moras dengue ne’e tanba daudaun ne’e tempu udan, kazu dengue sempre mosu kada tinan.
Nune’e atu evita kazu ne’e, antes ne’e Xefe departementu moras kontijioza no la’ós kontajioza iha servisu saúde rejionál, Patrício da Costa, apela ba komunidade iha rejiaun ne’e atu koopera malu hamoos sasán ka limpeza hanesan roda aat, vazu ai-funan atu susuk labele tolun.
Tuir dadus nasionál hosi saúde públika liuhosi Departamentu Vijilánsia Epidemiolojia iha Ministériu Saúde (MS), daudaun ne’e rejista ona kazu dengue iha Timor-Leste hamutuk 2.281 hosi númeru ne’e na’in-30 lakon ona vida.
Maioria kazu hirak-ne’e deteta hosi munisípiu Dili ho totál 1.413, Baucau 105, Manatuto 142, Covalima 68, Ermera ho kazu 90, Manufahi 95, Viqueque 53, Ainaro 27, Liquiçá 74, Aileu 69, no Bobonaro 32, Lautem 93 no RAEOA na’in-tolu.
Jornalista : Abílio Elo Nini
Editór : Evaristo Soares Martins
