Top

Vítima inundasaun 4 abríl na’in-70 re-integra ona ba munisípiu

Vítima inundasaun ne’ebé akontese iha loron 21 fevereiru 2022, daudaun hela iha sentru akollimentu Don Bosco, Comoro, tersa (22/02). Imajen TATOLI/António Dasiparu

DILI, 23 fevereiru 2022 (TATOLI)— Sekretáriu Estadu Protesaun Sivíl (SEPS), Joaquim José Gusmão dos Reis, informa SEPS hamutuk Ministériu Administrasaun Estatál (MAE) no Autoridade Munisipál re-integra ona vítima dezastre naturál iha 4 abríl 2021 hamutuk 70-resin ba iha munisípiu orijinál.

“Ita konsege re-integra uma-kain 70-resin ne’ebé mak hela iha sentru alojamentu provizóriu  ba fali sira nian munisípiu,” Sekretáriu Estadu ne’e hateten jornalista sira iha nia knaar fatin SEPS Caicoli, kuarta ne’e.

Uma-kain 70-resin ne’ebé SEPS konsege lori fila ba iha sira nia munisípiu hanesan Rejiaun Administrativu Espesiál Oé-cusee no Ambeno (RAEOA), Viqueque, Ainaro no Baucau.

Daudaun ne’e, SEPS, MAE no Autoridade Munisípál hala’o mediasaun ba vítima afetadu dezastre naturál iha 4 abríl 2021 atubele muda ba munisípiu orijinál.

“Ita kontinua halo mediasaun ho ita nian maluk sira vítima 4 abríl 2021 ne’ebe daudaun balun sei hela iha sentru akollimentu no balun ne’ebé mak antes ne’e ami hamutuk ho MAE no Autoridade Munisipiu Dili lori sira ba hela alojamentu provizóriu ka kost hodi ita bele  solusaun tiha sira nia problema liuliu transport aba munisípiu,” dehan SEPS Joaquim Gusmao.

 SEPS fó apoia rekupersaun materiál mao de obra ho osan ba sira, hodi sira ba halo uma iha fatin seluk, tanba sira nia uma ne’ebé hetan estragu ne’e iha fatin risku ka iha mota laran, foho leten.

“Ita la autoriza ona sira halo sira nia uma iha ne’ebá, nune’e ita fó opsaun seluk mak fó rekuperasaun iha fatin seluk no SEPS prontu lori fila sira  ba munisipiu orijen. Seluk governu realoka ba alojamentu provizóriu hodi hein to’o governu halo bairru-foun ba sira,” nia akresneta.

 Enkuantu tuir dadus hosi SEPS rasik, vítima 4 abríl 2021 ne’ebe sei hela iha sentru akollimentu hanesan iha eis restaurante Metiaut iha familia ida hamutuk ema nain-hitu, iha SD Akanunu Hera iha uma-kain  sia  no  iha sentru akollimentu  Dom Bosco na’in-30.

Notísia relevante:Udan iha Dili liu oras ida, Vítima inundasaun 4 abríl hakarak fila ba munisípiu

Jornalista: Natalino Costa

Editór     : Florencio Miranda Ximenes

Publisidade

Leave a Reply

Latest Post

error: Content is protected !!