DILI, 24 fevereiru 2022 (TATOLI)— Polisia Nasionál Timor-Leste (PNTL), munisípiu Dili liuhosi operasaun konjunta ne’ebé halo iha, kuarta (23/2), kalan, konsege detein joven ho inisiál AFX ne’ebé ho idade 16, tanba lori arma branka hanesan rama ambon no tudik hodi halo movimentu.
“Horikalan liuhosi pasa revista iha konfontu área Beto, suku Madohi, Dom Aleixo ne’ebé joven sira ataka malu no tuda malu, besik kedan postu Polísia rotunda la rezulta ema kanek, ne’ebé ita komunika patrollamentu Eskuadra Dom Aleixo nian ba halo atuasaun kedan ba situsaun refere. Liuhosi atusaun ne’e, ita mós detein hela joven ida ne’ebé lori hela tundik no Rama Ambon,” Komandante PNTL Munisípiu Dili, Superintendente Xefe, Henrique da Costa hateten ba jornalista sira bainhira partisipa seremónia rituál iha CNE-Colmera, kinta ne’e.
Notísia relevante:PNTL hahú reativa hikas “check point” iha tempu kalan
Daudaun ne’e, suspeitu AFX transfere mai ona parte operasaun Komandu Munisipiu Dili atu halo investigasaun, hodi kumpre oras 72, molok submeter ba Ministériu Públiku, hodi tuir prosesu julgamentu interogátoriu dahuluk iha Tribunál Disrtitál Dili.
Superintendente Xefe, Henrique afirma alende kaer suspeitu ne’e halo apreensaun ba motór 78 no karreta ida tanba motorista sira laiha karta kondusaun, laiha xapa matríkula no dokumentu komprovativu seluk.
“Ami foti ba para hela iha Komandu PNTL Munisipiu Dili, parte Trázitu Dili nian atu infratór sira selu tiha multa mak foin foti sira nian motor no karreta,” Komandante ne’e akresenta.
Komandu PNTL Dili orienta ona membru sira atu kontinua intensifika opersaun sira iha tempu kalan atu garante seguransa ba komunidade sira.
Notísia relevante:PNTL halo alerta tama-sai bairru sira iha Dili
Jornalista: Natalino Costa
Editór : Florencio Miranda Ximenes
