DILI, 25 fevereiru 2022 (TATOLI)— Ministériu Saúde simu apoiu 𝑅𝑎𝑝𝑖𝑑 𝐷𝑖𝑎𝑔𝑛𝑜𝑠𝑡𝑖𝑐 𝑇𝑒𝑠𝑡 𝐶𝑜𝑣𝑖𝑑-19 husi Repúblika Koreia liuhosi ájensia Korea International Cooperation (KOICA) no Organizasaun Mundiál Saúde (MS) hamutuk 50.000.
Rapid Diagnostic Test (RDT) ba Covid-19 hamutuk 50.000 ho ninia valór osan US$ 165,000 ne’e entrega direta hosi Diretora KOICA, Eunju Cha, Asesór Politika Saúde OMS, Vinay Bothra no simu hosi Diretóra Jerál Saúde Odete da Silva Viegas iha Palácio das Cinzas, Caicoli, Dili.
“Ami sente kontente bele suporta ida ne’e espera katak ba oin nafatin fó ajuda ba Governu Timor Leste atu responde ba situasaun liuliu kombate COVID-19,” Diretora Ezekutiva KOICA Eunju Cha, hateten ba jornalista sira iha Palasiu Sinzas-Caicoli, sesta ne’e.
Iha fatin hanesan, Representante Asesor Politika OMS iha Timor Leste, Vinay Bortha, dehan apoia ne’e hanesan esforsu ida hodi Ministériu Saúde bele responde ba COVID-19.
“Teste sira ne’ebé mak suporta ona ne’e bele Ministériu Saúde halo rasik iha ne’e la presiza atu haruka tan ba iha rai liur tanba teste kits ne’e ajuda ita atu halo diagnostiku hodi deteta kazu COVID-19 ho lalais,” Asesó OMS ne’e esplika.
Nune’e Diretora Jerál Prestasaun Saúde Odete Maria Freitas Belo informa, ohin parseiru sira apoiu tan laboratoriu teste kist hamutuk 50.000 hodi teste ba iha COVID-19 nian.
Entretantu, Diretora Jerál Prestasaun Saúde Odete iha Ministériu Saúde, Odete Veigas Belo, agradese ba Governu Koreia liuhosi KOICA no OMS ne’e fó aona apoia atu ajuda haforsa kapasidade teste COVID-19 iha Timor-Leste hodi responde ba dezafiu iha pandemia globál ne’e.
“Apoia ne’ebé pareseiru sira fó atu reforsa liután pilar lima no haat nia servisu oinsá atu deteta no halo tratamentu ba ita- nia ema sira ne’ebé mak pozitivu ba COVID-19,” nia akresenta.
Diretóra Jerál ne’e dehan bainhira SARS-CoV-2 ne’e hahú hada’et iha Timor-Leste, OMS serbisu hamtuuk ho KOICA ho lalais re-aloka no mobiliza rekursu ne’ebé iha hodi bele fó apoiu másimu ba Governu Timor-Leste iha luta konta pandemia ida ne’e.
Hanesan parte ida husi esforsu hamutuk ida ne’e, KOICA no OMS fó ona doasaun kama médiku 100, no kama 500 ba fasilidade izolamentu no tratamentu. Dala ida tan, OMS no KOICA hamutuk fó apoiu ba Timor-Leste liuhusi apoiu test kit 50,000.
“Lori Ministériu Saúde no povu Timor-Leste nia naran, ha’u hakarak espresa ha’u nia apresiasaun no gratidaun hodi kontinua no konsidera fó apoiu hodi responde ba COVID-19 iha Timor-Leste,” nia agardese.
Partisípa iha serimónia termu entrega ne’e maka Embaixadór Repúblika Koreia ba Timor-Leste, Kim Jeong no kovidadu sira seluk.
Jornalista : Felicidade Ximenes
Editór : Florencio Miranda Ximenes
