iklan

BOBONARO, HEADLINE, MUNISÍPIU, SEGURANSA

PNTL Bobonaro halo apreensaun ba motorizada 61

PNTL Bobonaro halo apreensaun ba motorizada 61

PNTL munisípiu Bobonaro liuhosi seksaun tránzitu pasa-revista ba transporte públiku iha área kruzamentu bairru Obor, suku Raifun, postu administrativu Maliana. Imajen Tatoli/Sergio da Cruz.

BOBONARO, 25 fevereiru 2022 (TATOLI) – Polísia Nasionál Timor-Leste (PNTL) munisípiu Bobonaro,liuhusi seksaun tránzitu halo apreensaun ba motorizada 61 iha kapitál Maliana ba utente rodoviariu ne’ebe kontra regra kódigu estrada.

Komandante Seksaun Tránzitu Munisípiu Bobonaro, Primeiru Sargentu Mateus Siri-Loe, informa, aktivida ‘auto stop’ ne’e realiza bazea ba orientasaun hosi komandante munisípiu Bobonaro, Superintendete Antoninho ‘Mauluta’, hodi intensifika no halo kontrolu ba movimentu transporte públiku iha estrada públiku.

Atividade ‘auto stop’ ne’e hahú iha loron 22 fevereiru halo apreensaun motorizada  27  no iha loron 23 fevereiru halo apreensaun prende motorizada 16.

“Ohin, loron 25 fevereiru iha halo apreensaun ba motorizada 18 tanba infratór barak mak laiha karta kondusaun, balun liu prazu, dokumentu laiha no lakon, ne’e ita konsidera hanesan infrasaun,” nia ko’alia iha Maliana, sesta ne’e.

Hafoin atividade pasa-revista, ekipa tránzitu transporta kedas motorizada hirak-ne’e ba komandu polísia munisípiu Bobonaro atubele kompleta uluk prosesu administrasaun hodi selu multa iha Banku Nasionál Komérsiu Timor-Leste (BNCTL sigla portugues) sukursál Maliana nune’e bele hatama reseita ba kofre estadu.

Motorizada 27 ne’ebé halo apreensaun iha loron 22 fevereiru ne’e na’in-24 mak selu ona koima, falta haat. Nune’e mós iha loron 23 fevereiru ne’e motorizada 16 na’in-neen mak selu ona, restante seidauk.

Motorizada ne’ebé halo apreensaun iha loron 25 fevereiru iha motorizada 18 ne’e infrator na’in lima mak selu ona koima no falta 13.

“Maibe to’o agora ami seidauk iha dadus loloos kona-ba  montante orsamentu hira mak hatama ona ba kofre estadu,” nia katak.

Komandante PNTL munisípiu Bobonaro ne’e fó-sai katak, tránzitu munisipál iha ona planu atu implementa atvidade pasa-revista iha postu administrativu Bobonaro, Lolotoe, Caialco, Balibo no Atabae tanba utente rodoviáriu barak mak durante ne’e halo movimentu kontra kódigu estrada.

“Ha’u apela no konvida komunidade sira iha munisípiu Bobonaro laran tomak katak, sé de’it mak dokumentu mate ka karta  kondusaun laiha, hakbesik mai iha polísia tranzitu atu nune’e ami bele fasilita ita-boot sira ba trata iha dukumentu iha DTT Bobonaro, atu nune’e imi bele iha lisensa halo movimentu livre,” Mateus fó hanoin.

Jornalista   : Sergio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!