DILI, 01 marsu 2022 (TATOLI)— Prezidente Komisaun Nasionál Eleisaun (CNE, sigla portugés), José Belo, tersa ne’e, realiza enkontru ida ho Polisia Nasional Timor-Leste (PNTL) no FALINTIL-Forsa Defeza Timor-Leste (F-FDTL) no Servisu Sekretu sira hodi diskute kestaun seguransa iha períodu kampaña no eleisaun prezidensiál.
“Ohin, reuniaun koordensaun ida ho Komandante PNTL, F-FDTL no Servisu Nasional Intelenjia (SNI), liuliu komesa aban ba oin ne’e hahú kampaña. Nune’e Komandante Jerál sira mai esplika hela kona-ba situsaun atuál, liuliu kona-ba seguransa ninian oinsá fó seguransa ba ita nian kandidatu sira. Ita husu atu polisia fó seguransa no akompaña kandidatu hotu-hotu iha períodu kampaña to’o eleisaun hotu,” Prezidente CNE, informa ba jornalista sira hafoin ramata enkontru ho atuoridade seguransa iha Salaun Laline Larigutu-CNE, Colmera, tersa ne’e.
Prezidente CNE ne’e mós husu ba Komandante PNTL atu durante kampaña no eleisaun tenke fó tratamentu espesiál ba kandidatu balun.
“Ohin, ha’u dehan ba Komande Jerál PNTL, lei protesaun ba ita nian kandidatu balun presiza mós tenke haree no ajusta mós ho situsaun tanba iha kampaña ne’e atuál Prezidente Republika mós re-kandidata aan, iha mós Ramos Horta hanesan eis-titular no iha mos eis Tenente Jenerál Reformadu Lere Anan Timur, ita presiza haree,” afirma Prezidente CNE Jose Belo.
José Belo mós husu ba ekipa susesu kada kandidatu atu respeita ba regulamentu seguransa nian, ne’ebé fó iha kampaña.
CNE husu mós ba Kandidatu Prezidente Repúblika sira atu promove diálogu nafatin, respeita malu tuir paktu eleisaun ne’ebé kandidatu sira asina ona.
“Paktu ne’e la’ós hanesan lei de’it atu orienta, maibé paktu ne’e hanesan responsablidade morál ida, hanesan jestu ida, atu kandidatu idak-idak hatudu ba ita nian povu no ba públiku atu sai mos edukasaun ida ba povu tomak katak iha ámbitu kampaña ita bele nafatin la’o iha situasaun hakmatek nia laran,” nia akresenta.
Notísia relevante: CNE realiza seremónia asina paktu eleisaun pasífiku ba kandidatu PR
Jornalista: Natalino Costa
Editór : Florencio Miranda Ximenes
