ERMERA, HEADLINE, SAÚDE

Manán iha eleisaun, kandidata Milena Pires hakarak hadi’a povu nia moris

Manán iha eleisaun, kandidata Milena Pires hakarak hadi’a povu nia moris

Kandidata Prezidente Republika ba périodu 2022-2027 ho númeru sorteiu, Milena Pires. Imajen/Felicidade Ximenes.

ERMERA, 02 marsu 2022 (TATOLI)- Kandidata Prezidente Republika ba périodu 2022-2027 ho númeru sorteiu 7, Maria Elena Lopes de Jesus Pires, kuarta ne’e, hala’o abertura kampaña ho tipu diálogu popular iha salaun pároku Gleno, postu Administrativu Gleno, munisípiu Ermera.

Iha kampaña dahuluk ne’e, Kandidatu PR, Milena Pires, hateten nia parte hakarak kandidata an ba Prezidente Repúblika, la’ós deit atu sai líder másimu de’it, maibé tanba  hakarak hadi’a povu nia moris ho di’ak liután tuir kompeténsia Xefe Estadu.

“Ha’u hakarak dehan eleisaun prezidensiál importante tebes ba ita, tanba ne’e mak ha’u berani mai hamrik iha rai Gleno-Ermera ida ne’e hakarak sai kandidata an ba Prezidente Repúblika. Bainhira ha’u manán iha eleisaun sei lori ha’u nia lema mak líder foun, polítika foun mak dalan ba mudansa di’ak atu hadi’a povu nia moris di’ak,” Kandidata PR Milena Pires, kompromete bainhira hala’o kampaña dahuluk ho tipu diálogu popular iha Gleno.

Notísia relevante: Kandidatu PR Ângela Freitas kansela kampaña loron dahuluk iha Lautém

Kandidata PR ne’e akresenta bainhira eleita ba Prezidente Repúblika mak sei koopera ho ezekutivu ka Governu hodi  Timór-oan hotu hetan oportunidade hanesan. Tanba iha visaun katak hakarak Timor-Leste ida ne’ebé iha ema hotu iha oportunidade hanesan.

“Timor-Leste tenke iha justu ba ema hotu iha justisa nia oin,   la’ós justisa ba povu ki’ik de’it maibé,  boot sira justisa la kona,” nia akresenta.

Apoiante Kandidata Prezidente Republika ba périodu 2022-2027 ho númeru sorteiu, Milena Pires. Imajen/Felicidade Ximenes

Iha fatin biban hanesan, Koordenadora ekipa susesu iha munisípiu Ermera, Maria Exposto, afirma tempu to’o ona ba feto Timór atu sai Prezidente Repúblika.

“Tempu to’o ona ita vota ba númeru 7, ho Kandidata Milena Pires tanba nia hanesan autor ba 30% feto hodi hetan asentu iha Parlamentu Nasionál,” koordenadora kampaña munisípiu Ermera Maria Exposto esplika.

Nune’e, nia eekoraja ba Feto Ermera-oan liuliu iha Gleno atu fó votu ba Milena Pires hanesan kandidatu feto ne’ebé iha potensiál hodi lori aspirasaun feto Timor-Leste liuliu dook an husi violénsia.

Tuir oráriu husi Komisaun Nasionál Eleisaun (CNE,sigla Portugés), kampaña hahú iha tuku 10:00, maibé muda fali ba tuku 13:00,  lokoraik, tanba militante sira sei partisipa iha misa kuarta feira sinza.

Iha kampaña dahuluk hosi kandidata Milena Pires ne’e observa husi fiskál CNE, observadór internasionál hosi Uniaun Europeia no hetan seguransa másimu hosi  Polísia Nasionál Timor-Leste (PNTL) munisípiu Ermera.

Notísia relevante: Kandidatu PR Rogério Lobato kansela kampaña aberta iha Gleno

Jornalista:  Felicidade Ximenes /Argentina Cardoso

Editór      : Florencio Miranda Ximenes

iklan
iklan

Leave a Reply

iklan
error: Content is protected !!