CNE Baucau kestiona Ângela Freitas hala’o kampaña iha Buruma
BAUCAU, 03 marsu 2022 (TATOLI) – Komisaun Nasionál Eleisaun (CNE, sigla portugés) Munisípiu Baucau, kestiona kandidata Prezidente Repúblika, Maria Ângela Freitas, hala’o fali kampaña iha Buruma tanba loloos ne’e tenke kumpre fatin ne’ebé deside ona antes ne’e.
Diretór CNE Munisípiu Baucau, Esmeraldo Damião Belo, esplika, tuir kalendáriu kampaña kandidata PR Ângela Freitas realiza iha Jináziu Baucau, Vila Nova, hahú hosi tuku 10:00 maibe laiha informasaun ruma kona-ba mudansa fatin.
“Tenke bazea ba sira-nia oras, fatin tuir oráriu ne’ebé deside ona, ami laiha informasaun ruma kona-ba mudansa fatin,” Diretór CNE Baucau informa Agéncia Tatoli, iha Baucau, kinta ne’e.
CNE rasik tenta halo konfirmasaun no ikus mai kampaña refere realiza fali iha suku Buruma nune’e Esmeraldo husu kada kandidatura sira atu kumpri tuir kalendáriu ne’ebé aprova ona nune’e labele mosu dezintendementu.
CNE Baucau simu orientasaun hosi nasionál tuir kalendáriu ne’ebé hato’o hosi kandidatura PR sira no hetan aprovasaun iha CNE nasionál antes públika no distribui to’o iha munisípu, autoridade seguransa inklui observadór sira.
Ho situasaun ne’e, CNE Baucau sei bolu koordenadór ekipa susesu Maria Ângela nian nune’e iha kampaña tuir mai labele akontese tán. Ho mudansa fatin ne’e CNE Baucau, PNTL no observadór sira labele ba monitoriza kampaña eleitorál ne’e.
Hatán ba kestaun ne’e, Koordenadór Ekipa Susesu Nasionál Maria Angela Freitas, Eliezer de Araújo liuhosi telemovél hateten, desizaun muda fatin kampaña mai hosi koordenadór munisípiu nunu’e infroma ona ho parte CNE kona-ba mudansa refere.
“Iha Jináziu kansela, koordenadór munisípiu mak deside muda ba Buruma,” Eliezer de Araújo argumenta.
Observasaun hosi Agência Tatoli iha terrenu nota katak, ofisiál CNE, seguransa inklui observadór sira uluk ona fatin kampaña Jináziu Vila Nova maibe to’o oras Maria Ângela Freitas ho ninia ekipa hala’o fali kampaña iha Buruma.
Jornalista : Natalino Belo
Editór : Evaristo Soares Martins
