Isabel Ferreira hakarak transforma mentalidade família
BAUCAU, 03 marsu 2022 (TATOLI) – Kandidata Prezidente Repúblika Isabel Ferreira, hakarak tansforma mentalidade família bainhira eleita nu’udar Xefe Estadu iha rezultadu eleisaun prezindensiál.
Kandidata Independente ho númeru sorteiu 1, Isabel Ferreira hateten, situasaun Timor nian sai prekupante nune’e obriga nia kandidata ba Prezidente Repúblika tanba sosiedade iha família hahú fraku no naksobu nune’e ladi’ak ba nasaun.
“Transformasaun mentalidade hakarak ka lakohi iha tenke halo, ha’u esperu joven sira sente ida-ne’e tanba konsekuénsia ba situasaun sira-ne’e hotu, família kiak no mukit sira mak sai vítima ba prosesu ida-ne’e,” Kandidata Isabel Perreira hateten iha Sentru Konvensaun Baucau (CCB, sigla Portugés), kinta ne’e.
Espoza Primeiru Ministru Taur Matan Ruak ne’e konsidera família iha uma laran daudaun ne’e ameasada tanba estadu durante foka liubá konstrusaun fíziku, abandona tiha ema hanesan lakon atensaun ba nutrisaun nune’e fó impaktu ba mentalidade sidadaun
Nune’e mós presiza oferese formasaun ba juventude sira bainhira atu forma família nune’e família ne’e nakonu ho domin.
“Ita la investe ba labarik ho joven sira, kondisaun saida mak kria ona ba sira? Ida-ne’e sai ameasa ba futuru,” Isabel argumenta.
Espoza Prezidente Partidu Libertasaun Populár ne’e ne’e aprezenta kauza ekonomia no sosiál durante kampaña eleitorál mak hanesan família, komunidade no nasaun.
Tanba ne’e presiza família saudável no sustentável, presiza igualidade oportunidade no asesu ba serbisu bázika sira hotu, tenke kuda iha lokalidade hotu-hotu tanba koezaun, uniaun no dezenvolvementu sustentável.
Nia fundamenta, igualdade, inkluzaun no interasaun tanba konsidera sidadaun hotu-hotu importante no iha papél ba dezenvolvementu família no komunidade, konsiénsia, partisipasaun ativa ho demokrátiku, produtividade, inovasaun no empreendederorismu.
Isabel Perreira promete bainhira eleita nu’udar Prezidente Repúblika, sei hakbesik ba família, komunidade, kbiit laek sira, labarik, joven sira, organizasaun sira no besik ba ema lian laek sira.
Nune’e mós sei dezenvolve devér tolu sidadaun nian hanesan boa governasaun, poupansa no responsablidade transparánsia.
Jornalista : Natalino Belo
Editór : Evaristo Soares Martins
