DILI, 03 marsu 2022 (TATOLI)— Xefe Departamentu Relasaun Públika Komandu Jerál Polisia Nasionál Timor-Leste (PNTL), Superintendente Xefe Armando Monteiro, informa maske, Kandidatu Prezidente Repúblika períodu 2022-2027 na’in-16, hahú kampaña eleitorál iha kuarta (02/03), maibé seituasaun iha territóriu nasionál la’o hakmatek.
“Ha’u atu informa deit katak, durante atividade kampaña eleitorál ne’ebé hahú horisehik to’o ohin, ami seidauk rejista kazu ruma. Ha’u bele dehan situasaun territóriu nasionál la normál no kontroladu,” Superintendente Xefe Armando Monteiro, hateten ba Agência TATOLI via telefónika, Kinta ne’e.
Notísia relevante: Dezloka ba munisípiu, Komandu PNTL husu membru hatudu disiplina no neutru
Armando Monteiro dehan situasaun la’o normál tanba ho baze ba relatóriu ne’ebé simu hosi hosi Komandu PNTL katak la rejista kazu ruma durante atividade kampaña eleitorál.
“Ha’u kontaktu ona Komandante munisípiu sira desde horiseik no sira balun atualiza ona situsaun iha kada munisipiu, relasiona ho atividade kampaña iha munisipiu sira situsaun la’o di’ak. Ha’u hein Komandante Munisípiu sira submete relatóriu loron rua nian mai ne’e maka ha’u foin ko’alia ba públiku. Tanba agora atividade la’o hela, maibe situasaun jerál la’o dia’k,” nia akresenta.
Notísia relevante:PNTL prepara ona membru 4.000-resin asegura kampaña no eleisaun
Jornalista: Natalino Costa
Editór : Florencio Miranda Ximenes
