BATUGADE, 03 marsu 2022 (TATOLI)—Kandidatu Prezidente Republika períodu 2022-2027, ho númeru sorteiu 10, Antero Bendito da Silva, kinta ne’e, hala’o kampaña daruak ho tipu diálgu populár iha postu Batugade, munisípiu Bobonaro.
Iha ámbitu diálogu popular ne’e, Kandidatu Antero Bendito promote bainhira hetan fiar hosi povu atu sai Prezidente Repúblika sei fó prioridade ba setór agrikultura tanba maioria populasaun moris ho toos no natar.
“Iha Timí laran tomak populasaun moris ho vida agrikultura hodi sustenta povu toos na’in no natar na’in sira nia moris. Ita-nia populasaun barak, maibé rai ba produtivu agrikultura ne’e menus. Nune’e bainhira ha’u mak manán iha eleisaun no sai Prezidente Repúblika mak fó prioridade ba sustentabilidade ba povu agrikultór ka toos na’in sira,” Kandidatu Prezidente Republika ne’e hateten liuhosi diálogu popular ba militante no apoiante sira.
Notísia relevante:Abertura kampaña iha Lautém, Horta introdús prioridade haat
Iha biban hanesan, Koordenadór Grupu Agrikultór Batugade, Joaquim Perreira, sente kontente tanba kandidatu Prezidente Repúblika Antero Bendito da Silva nu’udar toos na’in nia ona ne’ebé kandidata-an hodi tau matan ba povu ne’ebé moris ho agrikultór.
“Ami fó fiar no sei fó votu na kandidatu Prezidente Republika Antero Bendito no husu bainhira hakat ba Pálasiu Prezidensiál labele haluha ami toos na’in sira nia moris,” nia rekomenda.
Entertantu, Ekipa Susesu Kandidatu PR ne’e, Flaviano Mendonça Martins, hateten nafatin esforsu atu fó susesu ba nia kandidatura tanba eleisaun prezidensiál ne’e la’ós atu manan ka lakon, maibé hakarak lori lori povu agrikultór hodi promove ba juventude, estudante no traballadór-sira.
Tuir oráriu hosi Komisaun Nasionál Eleisaun (CNE,sigla portugés) kandidatu ho númeru sorteiu 10 sei hala’o kampaña ho dálogu popular iha Maubara-Liquiça, tuku 14 :00 to’o 18 :00, lokoraik.
Iha diálogu popular ne’e marka presenza husi observadór Internasionál,Uniaun Europeia, ekipa CNE, PDHJ, no hetan seguransa másimu husi Polisia Nasionál Timor-Leste (PNTL) munisípiu Bobonaro.
Notísia relevante:Eleitu ba PR, Lere hakarak promove diálogu lori povu ba moris di’ak
Jornalista : Felicidade Ximenes
Editór : Florencio Miranda Ximenes
