VIQUEQUE, 04 marsu 2022 (TATOLI)–Kandidatu Prezidente Repúblika (PR) períodu 2022-2027, ho númeru sorteiu 09, Armanda Berta dos Santos, hosi Partidu Kmanek Haburas Unidade Nasionál Timor-Oan (KHUNTO), promete sei promove unidade nasionál bainhira hetan fiar hosi povu.
“Bainhira povu fó fiar ha’u eleita ba Prezidente Repúblika, prioridade ida maka promove unidade nasionál no garante estabilidade iha nasaun laran,” Kandidatu PR Armanda Berta dos Santos, hateten iha iha kampaña aberta, iha kampu futeból Viqueque villa, sesta ne’e.
Notísia relevante: Fó fiar sai Xefe Estadu, Armanda Berta hakarak luta ba prosperidade povu nian
Tuir nia, iha ukun rasik-an ne’e presiza kria polítika ida estável no hametin unidade nasionál hodi haburas paz.
“Ita presiza hametin polítika interna no externa hodi dudu dezenvolvimentu nasionál ba oin. Atu garante polítika externa, ita presiza konsistente mantein relasaun ho nasaun amigu sira ne’ebé durante ne’e fó apoiu mai Timor-Leste liuhosi kooperasaun bilaterál iha área ekonómia, edukasaun no sira seluk,” nia hato’o.
Aleinde ne’e, Kandidatu PR ne’e iha prioridade hanesan hametin soberania Estadu, fó hanoin ba Governu jere riku soin Timor-Leste, promove identidade nasionál no promove pás no estabilidade.
“Bainhira povu fó fiar mai ha’u eleita ba Prezidente Repúblika, komprimisu haat ne’e sai prinsipál durante ha’u-nia mandatu no sei kumpre Konstituisaun,” nia afirma.
Iha biban hanesan, Koordenadór Partidu KHUNTO munisípiu Viqueque, Marito Nunes, relata, simpatizante hamutuk 1.000 resin hosi partidu ne’ebé partisipa iha kampaña aberta ne’e hosi postu Ossu, Uatulari, Lacluta no Viqueque villa.
Kampaña ne’ebé hahú hosi tuku 14:00 to’o tuku 16:00, hetan supervizasaun hosi observadór internasionál hosi Uniaun Europeia (UE), Komisaun Nasionál Eleisaun (CNE, sigla portugés) no Provedoria Direitu Umanu no Justisa (PDHJ, sigla portugés) no hetan seguransa másimu hosi Polísia Nasionál Timor-Leste (PNTL).
Jornalista : Vitorino Lopes da Costa
Editora : Julia Chatarina
