iklan

NASIONÁL, ELEISAUN, HEADLINE, MUNISÍPIU, VIQUEQUE

Kampaña iha Viqueque, Xanana husu apoiante labele provoka malu

Kampaña iha Viqueque, Xanana husu apoiante labele provoka malu

Prezidente CNRT, Kayrala Xanana Gusmão, hato’o nia apoiu ba Kandidatu PR, José Ramos Horta, durante kampaña iha kampu Waibua eis kampu militár, munisípiu Viqueque, sesta (04/03). Imajen TATOLI/Jogerjo Guterres

VIQUEQUE, 04, marsu 2022 (TATOLI)–Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, husu ba apoiante Kandidatu Prezidente Repúblika (PR) períodu 2022-2027, ho númeru sorteiu 14, José Ramos Horta, labele provoka malu iha ámbitu kampaña.

“Bainhira provoka malu sei hamosu konfrontu no kria imajen ladi’ak ba kandidatu ne’ebé ita sei hili. Komisaun Nasionál Eleisaun (CNE, sigla portugés) aviza mai ita, bainhira ramata ko’alia (kampaña, hothotu fila ba idaidak ninia fatin ho di’ak, labele hakilar tuir malu hodi provoka malu. Atu nune’e fó ezemplu katak ita-nia kampaña la’ós atu mai halo rungu-ranga,” Xanana Gusmão apela iha ámbitu kampaña Kandidatu PR, José Ramos Horta, iha kampu Waibua eis kampu militár, munisípiu Viqueque, sesta ne’e.

Notísia relevante: Horta kompromete halo diálogu polítiku bainhira hetan fiar sai PR

Alende ne’e, aviza mós ba apoiante sira, hafoin kampaña, idaidak hamoos foer sira hanesan bee-hemu mamuk no foer seluk iha fatin kampaña, hodi nune’e labele kria lixu iha fatin públiku.

Kampaña Kandidatu PR ho númeru sorteiu 14 ne’e, tuir loloos hahú hosi tuku 10:00 to’o 14:00, maibé hahú fali iha tuku 11:00 to’o 14:00.

Antes ne’e, liuhosi Konferénsia Nasionál, Partidu CNRT deside apoiu Kandidatu PR, José Ramos Horta, kompete iha Eleisaun Prezidensiál.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!