MOP Baucau husu IGE normaliza estrada iha sentru votasaun
BAUCAU, 04 marsu 2022 (TATOLI) – Servisu Munisipál Obras Públika Munisípiu Baucau liuhosi koordenasaun ho Sekretariadu Tékniku Administrasaun Eleitorál (STAE) husu ba Institutu Jestaun Ekipamentu (IGE, sigla portugés) atu normaliza estrada iha fatin sentru votasaun.
Diretór MOP Baucau, Pedro Alexandre Guterres Perreira, hateten liuhosi enkontru ho STAE Baucau rezulta karta ne’ebé asina hosi Prezidente Autoridade Munisípiu (PAM) relata ona ba Ministériu Obra Públika (MOP) atu orienta IGE normaliza estrada iha sentru votasaun.
“Ami haruka karta ba ministru asina hosi PAM husu prezensa IGE ho tótal kilómetru 31.09 atu normaliza nune’e sentru votasaun sira-ne’e utiliza ba apoia materiál,” Diretór MOP Baucau hateten iha Vila Nova, sesta ne’e.
Pedro akresenta, desizaun iha nasionál tuir kompetensia espera IGE koloka material sira hodi destaka atu normaliza estrada sira iha sentru votasaun sira.
STAE Baucau rejista sentru votasaun hamutuk 32 mak kondisaun estrada susar asesu tanba difisil transporta material sensitivu no naun-sensitivu nune’e presija normaliza hosi parte kompetenti.
Sentru votasaun 32 iha área hanesan postu administrativu Laga hamutuk sentru votasaun tolu iha suku Atelari, Sagadate no Libagua.
Postu administrativu Baguia iha suku Afaloicai, Ossohuna, Haecone, Larisula no Samalari hamutuk sentru votasaun ualu.
Hosi parte postu administrativu Quelicai iha Uadaboro sentru votasaun ida, Baucau Vila iha Suku Gariuai, aldeia Uatuwa iha sentru votasaun ida, Venilale iha Suku Uaioli, Bahamori no postu Venilale iha Uaharebo.
Jornalista : Natalino Belo
Editór : Evaristo Soares Martins
