Top

TDD absolve padre Hermínio hosi kazu publikasaun relatóriu KJP

Logotipu TDD. Imajen Tatoli/Egas Cristóvão.

DILI, 04 marsu 2022 (TATOLI)— Tribunál Distritál Dili (TDD), sesta ne’e, deside absolve arguidu Padre Hermínio Fátima Gonçalves no arguidu na’in tolu seluk hosi krime violasaun segredu justisa  liga ba públikasaun relatóriu Komisaun Justisa no Pás (KJP).

Iha leitura sentesa ne’ebé lee hosi juíz Evangelino Belo katak arguidu eis-Diretór Komisaun Justisa no Pás (KJP) ho arguidu na’in tolu seluk hanesan José Cardoso Moreira, André Gonçalves no Libánia Martins Amarál livre total hosi akuzsaun ne’ebé Ministériu públiku atribui no la selu kustu judisiáriu ruma.

Notísia relevante:TDD rona deklarasaun Xanana ba publikasaun relatóriu KJP

Tribunál deside absolve arguidu na’in haat ne’e tanba ho baze ba durante julgamentu ba kazu ne’e la haree no deteta faktu katak arguidu nain haat mak públika relatóriu peskiza Topo Honis hosi relatóriu peskiza Komisaun Justisa no Pás ne’e.

“Durante iha julgamentu nia laran la identifika no laiha faktu ida komprova katak   relatóriu peskiza ba kazu Topo Honis ne’e Padre Hemínio mak Publiku no  haforsa hosi sasin sira  hanesan Kay Rala Xanana Gusmão, Joaquim Fonseca no Barbara  ne’ebé deklara iha tribunál katak la’ós padre Hermino mak publika relatóriu refere. Tanba Arguidu sira laiha faktu ida hatudu katak sira tenke tama prizaun bazeia ba akuzasaun krime ne’ebé parte Ministeriu Públiku promove ba sira. Nune’e, mak tribunál deside absolve kazu ne’e, hosi arguidu sira,” Juíz Evangelino Belo hateten, iha sala audénsia julgamentu TDD.

Tribunál mós konsidera Arguidu Padre Hermínio no arguidu nain-tolu seluk sira halo relatóriu  peskiza ba kazu Topo Honis ne’e ho bazeia ba  orientasaun hosi Bispu Dioseze Dili nian liga ho  preokupasaun vítima labarik nain-tolu nian  ba kazu abuzu seksuál hasoru mininoridade ne’ebé  deskonfia halo hosi  kondenadu Ricahard Dasbach.

Tanba ne’e, Amo Bispo fo orientasaun ba Padre Herminio Fatima nudar Diretor Komisaun Justisa Deosese Dili nian halo misaun hodi  ba  halo peskiza  ida ne’e.

Ministériu Publiku antes ne’e  akuza arguidu sira ba prátika krime violasaun sekredu justisa ne’ebé previstu iha artigu 291 hosi Kódigu Penál Timor Leste.

Audiénsia julgamentu preside husi juíz singular Evangelino Belo, Ministériu Públiku reprezenta hosi Prokuradór Matias Soares no arguidu sira hetan asisténsia legál hosi Advogadu privadu Miguel Faria no Madre Tomazia Maria de Deus.

Hafoin rona desizaun hosi tribunál, Padre Hermínio Fátima Gonçalves, sente kontente no hato’o agradesementu wain ba Maromak tanba ho kbi’it tomak mak tribunál bele absolve nia kazu.

“Ha’u agradese ba Maromak, tanba nia grasa sira mai hanesan Padre ida. Segundu ha’u agradese ba Juíz ida ne’ebé ka’er ha’u nia kazu ne’e ho imparsiál tebes. Tanba bele haree kazu ne’e ho di’ak, nune’e ikus mai la terbukti no bele absolve ha’u nia kazu ne’e iha tribunál,” Padre Herminio agradese.

Amu Hermínio dehan durante tinan rua nia laran nia ho arguidu na’in-tolu seluk la tuur hakmatek tanba dala wain tenke ba mai iha Tribunál hodi tuir julgamentu ba kazu ne’e.

“Ami kuaze tinan rua iha kazu ne’e nia laran de’it, dezde iha 2020 to’o ohin,  ami nia servisu lakon lubuk ida, maibé ohin iha ona desizaun ba ami nia kazu ne’e,” dehan nia.

Notísia relevante:TDD rona deklarasaun Joaquim no Barbara ba kazu publikasaun relatóriu KJP

Jornalista: Natalino Costa

Editór     : Florencio Miranda Ximenes

Publisidade

Leave a Reply

Latest Post

error: Content is protected !!