iklan

HEADLINE, SEGURANSA

Kazu sona membru F-FDTL foun iha Kuluhun, PNSIK identifika ona suspeitu ida

Kazu sona membru F-FDTL foun iha Kuluhun, PNSIK identifika ona suspeitu ida

Membru F-FDTL foun ne’ebé joven deskuñesidu sira sona iha Kuluhun, iha sábadu (05/03) madrugada. Imajen.Espesiál.

DILI, 06 marsu 2022 (TATOLI)—Komandante Polísia Nasionál Servisu Investigasaun Kriminál (PNSIK), Superientendente Xefe Polísia José Maria Neto Mok, hateten kazu sona membru F-FDTL foun iha Kuluhun ne’ebé akontese iha sábadu (04/03) madrugada ne’e tama ona ba prosesu investigasaun.

José Maria Neto Mok informa, liuhosi investigasaun ne’e Polísia Nasionál Servisu Investigasaun Kriminál (PNSIK) identifika ona suspeitu mane ida (1) ne’ebé deskonfia envolve iha kazu sona membru F-FDTL foun refere.

“Kronlojia ba kazu ne’e rasik, ami seidauk bele fó sai tanba sei iha hela investigasaun nia laran. Kazu ne’e ami mak kaer. Horisehik ema na’in-lima ne’ebé deskonfia envolve iha kazu ne’e rasik, polísia lori mai ona mai ami-nia fatin. Agora daudauk ami halo hela   identifiksaun. Iha ema ida de’it mak ita deskonfia hanesan suspeitu ba kazu ne’e,” Superientendente Xefe Polísia José Maria Neto Mok hateten ba ba Agência TATOLI liuhosi WhatsApp, domingu ne’e.

Nia informa, ema ida-ne’ebé deskonfia hanesan suspeitu ne’e mane ida maibe seidauk hatene loloos nia identidade.

Komandante Polísia Nasional Timor-Leste (PNTL) Munisípiu Dili, Superintendente Xefe Polisia, Henrique da Costa, informa kazu membru F-FDTL foun ne’ebe hetan sona ne’e akontese iha sábadu madrugada iha tuku 04h00, bainhira vitima membru F-FDTL ne’e ho nia kolega hemu tua iha área Kuluhun, tekir-tekir joven deskuñesidu sira halo asaun atake hodi sona vitima rezulta kuak haat.

Hafoin akontesimentu ne’e, nia dehan, PNTL ekipa patrollamentu Nain Feto kompostu hosi Polísia Nasionál Servisu Investigasaun Nasoinál (PNSIK), Servisu Intelijénsia Militár (SIM), Servisu Intelijensia Polísia (SIP) no Polísia Militár (PM) konsege kaptura ema na’in-lima (5) hodi halo identifiksaun.

Rama Ambon, tudik no Fízika. Imajen/Espesiál.

“Hafoin insidente ne’e, ekipa patrollamentu eskuadra Nain Feto, SIP, halo passa revista ema sira iha ne’ebá hodi detein ka kaptura ema na’in-lima. Hosi ema na’in-lima ne’e feto na’in-tolu (3) no mane ida (1). Iha passa revista ne’e, ita hetan sasán evidénsia tudik ida, rama Ambon oan tolu no fízika ida,” Komandante Polísia Nasional Timor-Leste (PNTL) Munisípiu Dili, Superintendente Xefe Polísia, Henrique da Costa, informa ba Agência TATOLI liuhosi WhatsApp.

Hafoin akontesimentu, nia dehan, Polísia Militár to’o kedas iha fatin akontesimentu hodi lori ema na’in-lima ne’e inklui evidénsia sira lori ba iha Kuartél Polisia Militár, Quintal Boot, hodi foti infomasaun ruma, hafoin entrega hikas ba Polísia Nasionál Servisu Investigasaun Kriminál (PNSIK) hodi halo prosesu investigasaun.

Jornalista : Natalino Costa

Editór       : Cancio Ximenes

iklan
iklan

Leave a Reply

iklan
error: Content is protected !!