iklan

EDUKASAUN, HEADLINE

MEJD identifika lista adisionál profesór mosu iha prosesu verifikasaun

MEJD identifika lista adisionál profesór mosu iha prosesu verifikasaun

Diretór Jerál Administrasaun no Finansa hosi MEJD, Antoninho Pires. Imajen Tatoli/Egas Cristóvão

DILI, 07 marsu 2022 (TATOLI)–Diretór Jerál Administrasaun no Finansa, Antoninho Pires, relata katak prosesu verifikasaun dadus ba profesór voluntáriu na’in-2.121 iha territóriu nasionál finaliza ona, maibé mosu lista adisionál hodi sai 3.000.

“Ministériu Edukasaun juventude no Desportu (MEJD) asegura hela dadus. Ami halo verifikasaun ne’e la’o tuir de’it lista ne’ebé Diresaun Servisu Edukasaun munisipál sira haruka mai ami, maibé iha prosesu verifikasaun ne’e ami hetan tan fali lista adisionál ne’ebé la tama iha lista ne’ebé ami simu,” Diretór Jerál informa ba Agência TATOLI, iha edifísiu MEJD, Villa Verde, segunda ne’e.

Notísia relevante: Ministru Armindo Maia esforsu rezolve preokupasaun profesór kontratadu

MEJD realiza prosesu verifikasaun dadus ba profesór voluntáriu iha territóriu nasionál bazeia ba lista ne’ebé ministériu simu hosi Diresaun Servisu Edukasaun munisipál sira, tanba ne’e MEJD konsege rekolla ona dadus profesór voluntáriu 2.121.

Daudaun ne’e parte relevante asegura hela lista adisionál hodi hein desizaun MEJD atu hatene loloos paraderu profesór sira.

Tanba antes ne’e, kada fulan Governu sempre halo pagamentu ba profesór sira ne’e bazeia ba lista refere, maibé hafoin mosu prosesu verifikasaun ne’e, parte kompetente sei separa lista sira.

“Ita sei hein hela desizaun hosi Ministru, kuandu fó dalan mak ita sei halo mós verifikasaun ba profesór sira ne’e hodi buka hatene durante ne’e sira hanorin iha ne’ebé, se lae naran de’it mak iha maibé ema ita la koñese,” nia akresenta.

Enkuantu, Prosesu verifikasaun dadus ba profesór voluntáriu 2.121 ne’e, hosi Rejiaun Administrativa Espesiál Oé-cusse Ambeno (RAEOA) mak MEJD la tama tanba la simu dadus.

Jornalista : Tomé Amado

Editora     : Julia Chatarina

iklan
iklan

Leave a Reply

iklan
error: Content is protected !!