DILI, 07 marsu 2022 (TATOLI)— Asistente Treinadór Fíziku no Dezeñu Programasaun no Analiza Tékniku Selesaun Nasional U-19, Francisco de Araújo, hateten, ekipa ne’ebé sira lidera preparadu atu ba kompete iha jogu internasionál Asian Football Federation (AFF) Cup 2022 ne’ebé sei hala’o iha Indonézia, iha fulan-julu tinan ne’e.
“Daudaun U-19 sira ne’ebé ami prepara hahú pronto atu ba joga iha tinan ne’e iha jogu AFF CUP 2022 nian,” Francisco hateten ba Agência TATOLI iha edifísiu Federasaun Futeból Timor – Leste (FFTL), segunda ne’e.
Daudaun ne’e, prepara hela jogadór na’in-26, hosi númeru ne’e jogadór balun mai hosi munisípiu sira hanesan Covalima na’in tolu, Manufahi na’in-rua, Baucau na’in-ida, Lautem na’in-rua no jogadór na’in 10 mak hamutuk hela ho selesaun nasionál U-23 no maioria hosi Dili.
Treinamentu ba jogadór hirak ne’e hahú iha janeiru to’o ohin loron no sei kontinua to’o sira sai hosi Timor-Leste.
Oráriu ba treinamentu hosi jogadór U-19 ne’e hahú segunda to’o sesta iha kampu FFTL Dili.
“Iha janeiru ne’e, ami treinu adaptasaun no introdusaun game modelu bazeia ba ita nia filosofia ne’ebé mak hatuur hosi Diretór Tékniku ho Instrutór Asian Football Confederation (AFC) iha Timor-Leste, bainhira jogadór sira intende hotu ona modelu game, iha marsu nia laran ne’e ami tama fali ba konstrusaun baze ba fíziku relasaun ho game, modelu, tátiku no seluk tan,” nia esplika.
Jornalista: Hortencio Sanchez
Editór : Florencio Miranda Ximenes
