DILI, 08 marsu 2022 (TATOLI)— Organizasaun Mundiál Saúde (OMS) iha Timor-Leste entrega ekipamentu jinástika Open Air GYM unidade 30 ba Ministériu Saúde (MS) hodi instala iha munisípiu 12 inklui Rejiaun Administrativu Espesiál Oé-Cusse no Ambeno (RAEOA) hodi prevene moras la hadaet.
“Atividade fiziku importante atu kontrola moras la hada’et sira atubele kontribui ba redús moras sira ne’ebé mak durante ema ida idak iha,”Reprezentante Organizasaun Mundiál Saúde iha Timor Leste, Arvind Mathur hateten Palasiu Sinzas-Caicoli, tersa ne’e.
Iha evidénsia sira ne’ebé hatudu kuaze ema besik millaun 5 kada tinan mate tanba relasiona ho la halo atividade fíziku, hosi númeru ne’e kazu mortalidade no kuaze 30% kompara ho ema sira ne’ebé mak halo atividade ezersísiu.
“Ita la halo atividade mak 20% to’o 30% kontribui ba mate kompara ho ema sira ne’ebé mak halo atividade fíziku,” nia akresenta.
Iha biban hanesan, Vise Ministru Saúde, Bonifacio Maucoli dos Reis, hateten la ho atividade fízika hanesan fatór risku ida ne’ebé kontribui mós ba moras króniku la hada’et iha Timor Leste.
Relasiona ho dadus estimativa OMS nian revela katak, 45% ema Timoroan mate anualmente tanba moras króniku la hada’et sira.
“Atividade fiziku ne’ebé regular bele evita husi moras la hada’et sira hanesan moras fuan (cardiovascular), stroke, diabetes no kankru no sira seluk, nune’e presiza halo atividade fízika regular hodi ajuda prevene moras la hada’et sira.
Alende ne’e, ekipamentu open air Gym sei distribui ba fatin instalasaun mak hanesan Minsitériu Adminsitrasaun Estatál (MAE), Ofisina Universidade Nasonál Timor Lorosae (UNTL),Comoro Rotunda, Becora, Ofisina SEJD, Diresaun Nsionál Kontrolu Moras Lahane, Munisípiu Baucau, Aileu, Ainaro, Bobonaro, Manatuto, Manufahi, Viqueque Liquiça, Covalima, Ermera, RAEOA no Lautem.
Jornalista : Felicidade Ximenes
Editór : Florencio Miranda Ximenes
