CNE aprova kalendáriu mini kampaña kandidatura PR na’in-lima iha Baucau
BAUCAU, 09 marsu 2022 (TATOLI) – Komisaun Nasionál Eleisaun (CNE, sigla portugés ) aprova ona kalendáriu mini kampaña hosi kandidatura Prezidente Repúblika na’in-lima ne’ebé sei hala’o iha Baucau.
Kandidatura na’in-lima mak hanesan kandidatu PR José Ramos Horta, Franscisco Guterres ‘Lú Olo’, Lere Anan Timur, Armanda Berta dos Santos no Anacleto Bento Ferreira.
Diretór CNE Munisípiu Baucau, Esmeraldo Damião Belo hateten, kandidatu na’in-lima refere iha direitu halo mini kampaña tanba ekipa susesu hatama pedidu no CNE halo ona aprovasaun iha loron dumingu (06/03).
“Kandidatu ne’ebé mak hakarak halo mini kompaña tenke hatama pedidu mai loron-lima antes tuir lei haruka,” Diretór CNE Baucau hateten iha Vila Nova, kuarta ne’e.
Esmeraldo esplika, bainhira ekipa susesu sira hakarak halo mini kampaña obrigatoriumente tenke hatama pedidu inklui kalendáriu kampaña loron-lima antes tanba CNE hanesan órgaun eleitóral halo ninia funsaun supervizaun no antesipa mosu konfrontasaun entre militante hosi kandidatu sira.
Jornalista : Natalino Belo
Editór : Evaristo Soares Martins
