BOBONARO, 09 marsu 2022 (TATOLI) – Kandidata Prezidente Repúblika ho númeru (7), Maria Helena Lopes de Jesus Pires, promete kombate polítika klientilizmu iha serbisu administrasaun públiku no tenke hatuur ho kapasidade bazea ba méritu.
Kandidata Milena Pires foka asuntu ne’e liuhosi atividade kampaña eleitorál ho tipu diálogu populár iha suku Lahomea, postu administrativu Maliana, munisípiu Bobonaro ho tema “Líder foun, polítika foun mak dalan ba mundansa no povu nia moris di’ak”.
“Ita presiza Prezidente Repúblika ida-ne’ebé la sadere ba partidu polítiku, la ta’uk atu ko’alia sai katak ita-nia instituisaun estadu sira labele iha intensaun atu politiza. Ezemplu partidu ida sa’e muda estrutura ne’e tomak, tau ema-ne’ebé kór polítika hanesan. Ida-ne’e mak ita-nia rai atu la’o ba oin susar tebes, tanba ne’e ha’u sei tau estrutura sira ne’e tuir méritu, la haree ba sistema partidária no familiarismu,” Milena Pires hateten iha Maliana, kuarta ne’e.
Milena Pires mós promete sei influénsia governu kona-ba polítika públika, tanba durante ne’e repartisaun governu iha institituisaun públiku sira, povu atu trata de’it dukumentu mós susar.
Implementa programa prezidénsia aberta
Iha diálogu populár ne’e, kandidata ho númeru sorteiu (7) ne’e promete, bainhira povu fó fiar asume kargu nu’udar Xefe estádu mak sei tau prioridade no implementa programa prezidénsia aberta atubele halo diálogu ho povu sira iha baze hodi rona direita prekupasaun kona-ba infraestrura bázika hanesan saúde, edukasaun, agarikultura nune’e uza nia kompeténsia propoin ba governu atu tau iha planu prioridade.
“Ha’u sei implementa programa prezidénsia aberta. Ha’u hanoin katak Prezidente Repúblika halo serbisu iha Dili durante semana rua no semana rua tenke tún ba baze atu haree povu nia moris ne’e oinsá, la presiza iha de’it munisípiu, maibé presiza ba mak fatin sira-ne’ebé ahi laiha, bee-moos laiha no estrada ladi’ak,” nia akresenta.
Prioridade seluk ne’ebé Kandidata Milena Pires hakarak mak sei promove diálogu ho governu atu buka meiu oinsá mak bele dada investidór estranjeiru mai investe iha Timor-Leste nune’e bele kria kampu traballu ba timoroan sira.
Entretantu Ekipa Susesu Kandidata Milena Pires, Maria Paixao, reforsa Milena Pires nu’udar kandidata feto ne’ebé iha kapasidade sufisiente atu fó igualdade ba joven no populasaun hotu atubele moris ho di’ak.
“Tempu to’o ona ita bele lori feto ida, inan ida ba tuur iha ai-tarak laran bele iha sensiblidade ba problema sira mak eziste, entaun iha loron 19 marsu agora tenke vota númeru 7 atubele ajuda nia konkretiza ninia mehi no implementa planu sira-ne’ebé nia trasa ona,” nia katak.
Tuir observasaun Agência TATOLI nian iha diálogu populár ne’e hetan observasaun hosi observadór internasional sira hosi Uniaun Europeia (UE) supervór sira hosi Komisaun Nasionál Eleisaun (CNE sigla portugés).
Nune’e mós Sekretariadu Tékniku Administrasaun Eleitorál (STAE), Provedoria Direitu Umanu no Justisa (PDHJ) no hetan seguransa másisma hosi Polísia Nasionál Timor-Leste munisípiu Bobonaro.
Jornalista : Sérgio da Cruz
Editór : Evaristo Soares Martins
