Ofisiál eleitorál na’in-880 iha RAEOA prátika simulasaun
OÉ-CUSSE, 09 marsu 2022 (TATOLI) –Ofisiál eleitorál na’in-880 iha Rejiaun Administrativa Espesiál Oé-Cusse Ambeno (RAEOA), prátika simulasaun hodi garante kualidade serbisu ho susesu iha loron eleisaun prezidensiál períodu 2022-2027.
Diretora STAE RAEOA Luiza da Costa, informa formasaun neo realiza durante loron tolu, hahú hosi segunda to’o kuarte fulan marsu tinan ne’e, ho objetivu atu hasa’e koñesimentu, nune’e bainhira hala’o serbisu iha loron eleisaun, tenke garante neutralidade no independénsia.
Iha Oé-Cusse realiza simultaniamente hosi sub-rejiaun Pante Makasar, Oésilo, Pásabe no Nítibe hamutuk 880, tanba kada estasaun votasaun destaka ema na’in-10, ho matéria prinsipál iha formasaun ne’e, hasa’e koñesimentu kna’ar no papél nu’udar ofisiál, prosesu votasaun prosesu apuramentu, prenximentu akta, hala’o simulasaun prátika saida sei servisu iha loron eleisaun,” Luiza da Costa ba Agência Tatoli iha Palaban, Oé-Cusse, kuarta ne’e.
Nia fó-sai katak, kontratu ne’ebé atribui ba ofisiál eleitorál sira, durante loron tolu hahú hosi 19 to’o 20 marsu, tanba sira-nia kna’ar iha sentru votasaun no estasaun votasaun tenke garante neutralidade.
Nia informa, mensajen prinsipál, parte STAE husu atu tau-an hanesan profisionál garante transparánsia, neutralidade no independénsia, nune’e bele garante eleisaun la’o di’ak iha ida-idak nia fatin, no kontribui pás no estabilidade iha RAEOA.
Formadór Avelino MarIa Lobato, hanesan brigadista hosi sub-rejiaun Pante Makasar, hateten formasaun ne’e, hanesan preparasaun molok hala’o serbisu iha terrenu, tanba ne’e festa demokrasia tenke garante ho esusesu.
“Objetivu durante loron tolu prepara ami-nia ofisiál eleitorál sira iha koñesimentu kona-ba lala’ok prosesu eleisaun, hahú hosi tuku 6:00 to’o prosesu apuramentu sentru votasaun, nune’e bele garante hodi fó susesu ba realizasaun eleisaun iha Oé-Cusse,” nia katak.
Entretantu iha RAEOA totál sentru votasaun hamutuk 60 no estasaun votasaun hamutuk 88, ho totál eleitór atu partisipa iha eleisaun prezidensiál períodu 2022-2027 hamutuk 51.459, komposta hosi mane 26.232 feto 25.263.
Jornalista: Abílio Elo Nini
Editór: Evaristo Soares Martins
