EKONOMIA, DILI, HEADLINE

MKAE- parseiru aprezenta rezultadu avaliasaun rekursu turístiku iha TL  

MKAE- parseiru aprezenta rezultadu avaliasaun rekursu turístiku iha TL   

Lagoa Tasi-Tolu nia furak bele sai potensia turistiku. Imajen/Foti husi google.

DILI, 10 marsu 2022 (TATOLI)— Ministru Koordenadór Asuntu Ekonómiku (MKAE), Agência Norte-Amerikana ba dezenvolvimentu Internasionál (USAID, sigla Inglés) no Banku Mundiál, kinta ne’e, hala’o semináriu hodi aprezenta rezultadu avaliasaun rekursu turístiku iha Timor-Leste. 

Hosi rezultadu avaliasaun turístika hatudu katak, maioria turista estranjeiru sira hakarak mai Timor-Leste ho razaun prinsipál tolu hanesan turista sira hakarak atu ba luku hodi haree paizajen furak no biodiversidade tasi-okos nian, turista sira hakarak la’o-sa’e iha foho sira atu haree Timor-Leste nia paizajen natureza ne’ebé furak no úniku no vizita sítiu relijiozu no istóriku sira.

“Setór turizmu pertinente tebes bá ekonomia Timor-Leste ne’ebé sai mós setór estratéjiku no baze importante ida ba setór turizmu hodi bele hatene klaru nia merkadu doméstika no internasionál sira ligadu ho atrasaun produtu turístika sira ne’ebé iha Timor-Leste,” Koordenadora Jerál Gabinete MAKE,Guida Monteiro hateten iha ámbitu semináriu entre Govenru no parseiru iha Timor Plaza-Dili, kinta ne’e.

Iha relatóriu analiza oferta no demanda tuir prespetiva turista nian mós mensiona katak Timor-Leste presiza implementa di’ak kona-ba planu Polítika Nasional Turizmu nian.

“Espera katak ho esforsu tomak husi governu liuhosi MCAE hodi halo koordenasaun másimu no di’ak hodi apoia planu Ministériu Turizmu, Komérsiu no Indústria (MTKI) hodi bele alkansa mehi sira iha Polítika Nasional Turizmu 2030 através Komisaun Inter-ministérial ba Dezenvolvimentu Turizmu (KIDT),” nia akresenta.

Banku Mundial hala’o analiza turístika ho baze ba pedidu VIII Governu Konstitusionál através MKAE iha tinan 2018 no konklui iha agostu 2021.

Iha biban hanesan, Reprezentante Nasionál Banku Mudiál ba Timor-Leste, Bernard Harborn, sujere ba Governu Timor-Leste no setór privadu tenke koopera atu garante no mellora infraestrutura no promosaun merkaduria iha lokál turístiku sira.

“Presiza meta ida atu hala’o dezenvolvimentu turizmu, maibé kooperasaun hotu-hotu nian mak fundamental liu,” nia akresenta.

Entretantu, Xefe  Projetu Turizmu ba Ema hotu, Peter Semone, dehan importánsia  ba Governu atu apoia Komisaun interministeriál hodidezenvolve turizmu, tanba setór ida ne’e sai resposabilidade ba ema hotu nian.

Iha Polítika Nasionál Turizmu 2030 ho títulu “Promove Identidade Nasionál” ne’ebé aprova ona iha Konsellu Ministru iha tinan 2017, enfaze katak molok to’o iha tinan 2030 setór turizmu sei kontribui reseita turístika internasionál hamutuk millaun $150, kada tinan no sei fó servisu ba kuaze ema na’in 15,000.

Tuir projesaun katak iha tinan 2030, vizitante internasionál mai Timor-Leste kada tinan sei to’o 200,000, kompara ho tinan 2014 ne’ebé ho númeru vizitante turista hamutuk 55,000. 

Dezenvolvimentu setór turizmu atu la’o ho susesu persiza partisipasaun intensivu husi ministériu relevante sira, tanba indústria turizmu ne’e setór ida ke transversal signifika interligadu ho setór sira seluk hanesan transportasaun, imigrasaun, seguransa rai-laran, infraestrutura, saúde, servisu óspitalidade no seluk-seluk tan, ne’e duni papél importante husi liña ministérial sira sai fatór determinante ida bá susesu dezenvolvimentu setór turizmu iha Timor-Leste.

Tanba papél no responsabilidade husi ministériu relevante sira importante ba dezenvolvimentu turizmu, através Primeiru-Ministru nia despaxu ho númeru 024/PM/VI/2019 hodi estabelese KIDT ne’ebé kompostu husi Ministériu Turizmu, Komérsiu no Indústria, Ministériu Planu no Ordenamentu, Ministériu Transporte no Komunikasaun, Ministériu Interior, Ministériu Arte no Kultura, Sekretariu Estadu Ambiente, ekretariu Estadu Kooperativa, Sekretariu Estadu Formasaun Profesional no Empregu, no seluk tan no bazeia ba despaxu refere komisaun ne’e prezide hosi MKAE.

Jornalista: Hortencio Sanchez

Editór    : Florencio Miranda Ximenes

iklan
iklan

Leave a Reply

iklan
error: Content is protected !!