MS-Menzies renova akordu kooperasaun kontrola moras hada’et

DILI,10 marsu 2022 (TATOLI)— Ministériu Saúde (MS) ho Menzies School of Health Research (Menzies), kinta ne’e, halo renovasaun ba akordu kooperasaun (MoU) atu kontrola moras hadaet sira iha Timor Leste.

Renovasaun akordu ne’e signifika katak Menzies no Ministériu Saúde sei kontinua servisu hamutuk durante tinan tolu tan, hodi halibur evidénsia ne’ebé sientífiku, permite tomadór desizaun sira atu asesu ba informasaun no dadus ne’ebé atuál no atu ajuda informa dezenvolvimentu polítika foun.

Biban ne’e, Ministra Saúde, Odete Maria Freitas Belo, hateten Menzies hanesan instituisaun peskiza saúde ida ne’ebé mak internasionalmente rekoñesidu ne’ebé mak dezenvolve ona relasaun di’ak durante tinan barak nia laran ho profisionál saúde barak no Ministériu Saúde Timor-Leste.

“Iha oportunidade ida ne’e, ha’u hakarak atu kontinua nafatin haforsa relasaun parseria no kooperasaun ne’ebé di’ak entre instituisaun rua liuhusi renovasaun akordu ida ne’ebé estabelese hela ho espetativa atu buka Menzies nia abilidade atu tulun ita hodi rekolla evidénsia sientífiku balun ne’ebé mak presiza hodi guia polítika no foti desizaun, atu bele kontrola moras hada’et sira iha Timor-Leste, no mós kapasita ita-nia rekursu umanu relasiona ho asisténsia médika no mós prevene moras infesaun sira,” refere nota ne’ebé TATOLI asesu, kinta ne’e.

Líder Menzies iha Timor-Leste Asosiadu, Joshua Francis, agradese tebes ba oportunidade hodi servisu hamutuk ho Ministériu Saúde no ko’alia kona-bá dedikasaun ne’ebé klaru hodi kombate moras infesiozu sira no hadi’ak liután saúde iha Timor-Leste.

 “Husi pandemia COVID-19, Timor-Leste hatudu ona impaktu husi efikasia parseria nian entre laboratóriu, saúde publika no doutór sira, hodi kombate dezafiu iha fatór saúde nian. Uza peskiza hanesan instrumentu ida, no foka mós kona-ba hasa’e kapasidade lokál no lideransa, ida ne’e posivel atu aplika prinsípiu sira ne’ebe hanesan hodi kombate moras infesaun sira seluk hanesan TB, HIV, dengue no pneumonia labarik.” Hateten Asosiadu Joshua Francis.

Entertantu, Diretór Menzies Alan Cass AO, hateten estabelese eskritóriu Menzies nian ida iha Timor-Leste iha 2019 hodi fó benefisiu ba parte rua.

“Ami nia prezensa iha Timor-Leste ne’e ajuda ona hodi planeia, kolabora no hala’o ami-nia peskiza no mós preparadu ho di’ak hodi suporta no hasa’e kapasidade funsionáriu lokál sira nian. Liuhusi servisu hamutuk ami bele kompriende di’ak liután nesesidade Timor-Leste nian no dezenvolve programa servisu no peskiza ne’ebé mak koresponde ba komunidade nia nesesidade ne’ebé ho prioridade a’as no parseiru servisu saúde sira. Ida ne’e demonstra ami-nia dedikasaun, no signifika ita bele realiza kompletamente ita-nia parseria kle’an liután ho Timor-Leste,” nia hateten.

Menzies nia projetu sira iha Timor-Leste ne’e projetadu atu hasa’e kapasidade iha área klinikál, vijilánsia no laboratóriu, subliña kona-ba importánsia husi sistema saúde nian hala’o servisu hamutuk hodi mellora resposta ba moras hada’et sira, tantu ba iha pasiente individuál no nível saúde públiku.

Jornalista : Felicidade Ximenes

Editór       : Florencio Miranda Ximenes