iklan

HEADLINE, SAÚDE

Janeiru to’o marsu, MS transfere ona pasiente 38 bá rai-liur

Janeiru to’o marsu, MS transfere ona pasiente 38 bá rai-liur

Primeiru Ministru, Taur Matan Ruak, enkoraja pasiente Covid-19 atu bele rekopera lalais hosi moras. Iha Sentru Izolamentu Ospitál Lahane, sabadu (18/09). Imajen Tatoli/Francisco Sony.

DILI,11 marsu 2022 (TATOLI)— Ministériu Saúde (MS) liuhosi Diresaun Nasionál Apoia Ospitalar no Emerjénsia, hahú hosi janeiru to’o marsu ne’e, transfere ona pasiente na’in-38 ba halo tratamentu médiku iha rai-liur, hosi númeru ne’e na’in-haat mak mate.

Xefe Departamentu Apoia Opsitalár no Enkaminamentu Ministériu Saúde, Emelita Augusta, informa iha fulan tolu nia laran konsege halo tranferénsia ba pasiente ho moras komplikadu hamutuk 38 ba rai-liur hodi halo tratamentu saúde.

Totál pasiente na’in-38 ne’e, na’in-31 halo hela tratamentu iha ospitár Indonézia no na’in-hitu hala’o tratamentu iha Malázia.

“Husi pasiente na’in-31 ne’ebé halo tratamentu ssaúde iha Indonézia ne’e balun fila ona ho kondisaun saúde rekuperadu hamutuk 11 no na’in-haat lakon vida no pasiente seluk kontinua halo tratamentu. Enkuantu pasiente ne’ebé mak halo tratamentu iha Malázia na’in-hitu ne’e na’in-tolu fila ona ho kondisaun saúde rekuperadu no na’in-haat sei halo tratamentu hela no mate laiha,” Xefe Departamentu ne’e hateten ba Agência TATOLI iha knaar fatin-Dili, sesta ne’e.

Daudaun, MS prosesa hela dokumentu pasiente 73 ne’ebé inklui mós Amu Bispu Dioseze Maliana, Don Norberto do Amaral, hosi númeru ne’e pasiente na’in-62 sei ba halo tratamentu saúde iha Indonézia no na’in- 11 ba Malázia.

“Ita sei transfere pasiente hirak ne’e inklui Bispu Don Norberto iha temu badak, maski ita sei problema ho alojamentu, maibé pasiente hirak ne’e tempu besik bá ona,” nia akresenta.

Pasiente sira ne’ebé mak halo tranferénsia ba ospitál nasaun rua ne’e maioria moras fuan, kankru no rins.

“Durante ne’e ita haruka ita-nia pasiente ba nasaun tolu, maibé ho sitausaun COVID-19 ita haruka deit ba nasaun rua hanesan Indonézia no Malazia,” Nia informa.

Kada tinan, Governu gasta orsamentu millaun $5 hodi halo transferénsia pasiente moras komplikadu sir aba rai-liur hodi halo tratamentu médiku.

Tuir dadus hosi Diresaun Serbisu Ospitár no Emerjénsia (DNSOE) hatudu katak iha tinan 2021 transfere pasiente 20 ba Indon’ezia no na’in-ida ba Singapura ho moras kankru no fuan. Enkuantu iha tinan 2022 haruka pasiente na’in-18.

Orsamentu 2022 ba MS

Governu prevee orsamentu ba Minsitériu Saúde iha OJE 2022 hamutuk $52,113,565, ne’ebé  aloka ba kategoria saláriu vensimentu $24,633,600, bens no servisu $13,564,957, kapitál menór $41,000,005, kapitál dezenvolvimentu $1,916,203, transferénsia públika $10,998,800.

Orsamentu ne’e, sei finansia ba programa tolu, sub-programa 19 no atividade 69 ne’ebé alokadu ba programa governasaun di’ak no instituisionál prevee $8,548,068, programa saúde alokadu $43,563,497 no igualidade jenéru no inkluzaun sosiál prevista $2,000.

Alende ne’e, Parlamentu Nasionál mós aprova proposta aumentu orsamentu adisionál liuhosi proposta rua hanesan proposta ho númeru 58 no númeru 60 atu Ministériu Saúde transfere orsamentu iha kategoria despeza ka salariu no vensimentu ba programa ho kodígu 805 kona-ba saúde ho sub-programa servisu ambulánsia no atividade servisu integradu emerjénsia médiku no ambulánsia.

Tanba, Diresaun Nasionál Apoia Servisu Médiku Emerjénsia ho dotasaun inisiál $340.000, maibé altera ka hasai $124.000 ba dotasaun final ho orsamentu $216.000 ne’ebé tau iha rúbrika salariu.

Iha Diresaun Servisu Nasionál Ambulánsia Emerjénsia Médika ho dotasaun inisiál ba atividade $50.958 hodi altera no tau tan $124.000 iha dotasaun final ba atividade $17.496,3.

Kona-ba proposta 60 iha programa kodígu 805 kona-ba saúde ho dotasaun insiál  hamutuk $10.998.800 hodi altera no hasai tiha $190.000 ba dotasaun finál $10,808,800.

Notísia relevante:  Kada tinan,Governu gasta millaun $5 transfere pasiente bá rai-liur

Jornalista : Felicidade Ximenes

Editór       : Florencio Miranda Ximenes

iklan
iklan

Leave a Reply

iklan
error: Content is protected !!