BAUCAU, 11 marsu 2022 (TATOLI) – Komandu Polísia Nasionál Timor-Leste (PNTL) Munisípiu Baucau, destaka membru na’in-neen hodi asegura materiál sensitive no la’ós-sentitivu eleisaun prezidensiál nian.
Komandante PNTL Munisípiu Baucau, Superintendente António de Sá, hateten durante materiál eleisaun rai iha salaun apuramentu administrasaun Baucau hosi Sekretariadu Tékniku Admistrasaun Eleitóral (STAE) Baucau, parte seguransa sei destaka membru hodi asegura tanba konsidera materiál hotu sensitivu.
“Hosi parte segurasa sei garante asegura durante prosesu tomak ho di’ak tuir prosedimentu sira hotu durante materiál sira asegura iha fatin ne’e,” Komandante PNTL Baucau hateten iha Vila Nova, sesta ne’e.
Komandu PNTL Baucau mós iha ona planu no koordena ho Komisaun Nasionál Eleisaun (CNE, sigla portugés) relasiona ho prosesu transportasaun materiál eleisaun prezidensiál ba sentru votasaun no estasaun votu sira iha munisípiu Baucau.
“Durante loron-neen, seguransa tenke rigór tanba materiál sira-ne’e sensitivu,” Superintendente António de Sá hateten.
Komandu PNTL Baucau mós sei la autoriza kualkér sidadaun sira atu asesu livre tama-sai iha fatin materiál eleisaun bainhira laiha koñesementu hosi parte seguransa no STAE, maibé ba sira-ne’ebé funsionáriu tenke uza kartaun identidade ofisiál tanba tuir orientasaun komandu nasionál distánsia tenke metru 25.
Superintendente António de Sá husu entidade hotu hanesan STAE, CNE, fiskál no observadór sira atu kontinua iha koordenasaun, komunikasaun no kolaborasaun atu fó susesu hahú hosi faze preparasaun to’o eleisaun prezidensiál.
Jornalista : Natalino Belo
Editór : Evaristo Soares Martins
