iklan

NASIONÁL, ELEISAUN, HEADLINE, MUNISÍPIU, VIQUEQUE

Dalan liga postu tolu kondisaun a’at difikulta STAE Viqueque transporta materiál

Dalan liga postu tolu kondisaun a’at difikulta STAE Viqueque transporta materiál

Diretór Servisu Sekretariadu Administrasaun Tékniku Eleitorál (STAE) munisípiu Viqueque, Humberto da Costa. Imajen TATOLI/Vitorino Lopes da Costa

VIQUEQUE, 14 marsu 2022 (TATOLI)—Diretór Servisu Sekretariadu Tékniku Administrasaun Eleitorál (STAE) munisípiu Viqueque, Humberto da Costa, relata, ekipa identifika dalan liga ba postu tolu ho kondisaun a’at, nune’e difikulta transporta materiál eleisaun ba fatin votasaun.

“Dalan ne’ebé ho kondisaun a’at iha postu tolu hanesan Viqueque liga ba suku Waimori, postu Lacluta liga Luhan Rai kuak no postu Uatulari parte suku Matahoi, fatin votasaun iha aldeia Iraler iha foho Matebian nia okos,” Diretór Servisu munisipál ne’e informa ba Agência TATOLI, iha ninia kanar fatin, segunda ne’e.

Tuir informasaun, materiál sensitivu no non sensitivu eleisaun sei distribui iha loron 18 marsu, akompaña ho parte seguransa hanesan Polísia Nasionál Timor-Leste (PNTL), nune’e iha loron 19 marsu mak realiza Eleisaun Prezidensiál.

“Iha Viqueque, dalan hirak ne’ebé a’at bainhira tempu udan, ami tenke haree karreta trasaun sira hodi bele tula meteriál sira, maibé bainhira bá mak ladi’ak, ami ho alternativu hanesan selu ema lalin ho kuda bá sentru votasaun,” nia akresenta.

Notísia relevante: STAE Viqueque simu materiál sensitivu kaixa 23 ba Eleisaun Prezidensiál

Maski dalan a’at, tenki to’o lori materiál sira to’o iha fatin sira ne’ebé dalan labele asesu.

“Ami iha esperénsia ona tanba eleisaun sira antes ne’e, kuda ho populasaun sira maka lalin materiál sensitivu no naun sensitivu sira,” nia haktuir.

Materiál eleisaun ne’ebé STAE Viqueque simu hamutuk kaixa 23, ne’ebé iha livru buletin votu hamutuk 1.321 no folla hamutuk 66.500.

Jornalista : Vitorino Lopes da Costa

Editora     : Julia Chatarina

iklan
iklan

Leave a Reply

iklan
error: Content is protected !!