DILI, 14 marsu 2022 (TATOLI)- Xefe Departementu Relasaun Públiku, Komandu Jerál Polísia Nasionál Timor-Leste (PNTL), Superintendente Xefe Armando Monteiro, husu ba militante, apoiante no simpatizante Kandidatu Prezidente Repúblika períodu 2022-2027, atu hamutuk kontribui no garante seguransa iha kampaña loron ikus iha munisípiu Dili.
“PNTL sempre garantia situasaun seguransa, maibé presiza mós kooperasaun no kontribuisaun mós hosi militante, apoiante, simpatizante no mós ekipa susesu atu tenke kumpre regra no norma ka prosedimentu ne’ebé mak ita nian órgaun eleitorál fó sai tiha ona. Nune’e ita hotu esperansa katak prosesu kampaña ikus iha Dili lao’ tuir dalan di’ak no demokrásia,” Portavóz ne’e hateten liuhosi Konferénsia Imprensa ne’ebé halao iha Komandu Jeral PNTL, Caicoli, segunda ne’e. .
Notísia relevante: PNTL Baucau la tolera indivíduu komete krime iha kampaña eleitorál
Nune’e, Portavóz ne’e dehan Komandu Jerál PNTL deside ona atu aumenta membru ba iha Komandu PNTL Dili atu asegura atividade kampañaa ikus iha Dili, hahú hosi loron 15 to’o 16 marsu ne’e.
Nia relata ohin, ofisialmente Komandu Jerál liuhosi Komandante Operasaun hasai ona diretiva espesiál ida ba Departementu Servisu no Unidade iha Komandu Jerál, Unidade haat ne’ebé maka destakadu iha kapitál Dili atu hatun rekursu másimu atu fó seguransa másimu ba kampaña eleitorál ikus.
“Ita husu ba kada indivíduu no presiza mós kontribui no partisipa ativu no másimu ba prosesu demokratisaun atu kampaña ne’e la’o iha ámbitu pás no estabilidade,” nia akresenta.
Situasaun iha territóriu nasionál la’o hakmatek
Entertantu, Portavóz Komandu Jerál PNTL ne’e, informa durante kampaña aleitorál iha territióriu nasionál la’o hakmatek.
“Ita nian situsaun iha nivél territóriu nasionál nian la’o hakmatek, mezmu iha asidente no insidente balun ne’ebe akontese durante ne’e, maibé buat hotu la’o diak,” Portavóz ne’e akresenta.
Iha semana daruak fulan-marsu, hahú loron 7 to’o 13, Komandu PNTL rejista asidente trafégu grave tolu kompostu rua iha Dili no ida iha postu administrativu Remixio-Aileu.
Hosi asidente trafégu ne’e mós halakon membru Komandu PNTL ne’ebé hala’o kna’ar hanesan seguransa iha Tribunál Distritál Dili hosi eskuadra Verra-Cruz no sidadaun nain-rua iha área Lurumata lakon vida, tanba lori motorizada laiha konsentrasaun.
Alende ne’e, Komandu PNTL mós hahú iha loron sábadu (12/3) rejista kazu omesídiu agravadu ida iha suku Nunumoge, postu administrativu Hatubelico, iha mós kazu asaltu ofensa integridade fízika simple no gravadu ne’ebé maka rezulta sidadaun ida ho inisial JX mate no ida fali LR kondisaun grave hafoin partisipa kampaña kandidatu Prezidente Repúblika númeru sorteiu 6 iha área Darsula inklui ema nain rua seluk hetan mós kanek kanek kamaan iha área Samalari tanba hetan tuda.
“Apela nafatin ba apoiante, milintante no ekipa susesu kada Kandidatu Prezidente Repúblika tenke koopera, nune’e kontribui ba pás no estabilidade iha ámbitu kampaña eleisaun prezidensiál,” Superintendente Xefe ne’e fó hanoin
Notísia relevante: Dirijente CNRT husu apoiante kandidatu PR Horta mantein dixiplina iha kampaña
Jornalista: Natalino Costa
Editór : Florencio Miranda Ximenes
