RAEOA hahú verifika buletin votu
OÉ-CUSSE, 14 marsu 2022 (TATOLI) – Brigadista na’in-60 hamutuk ho ekipa Sekretariadu Téknika Administrasaun Eleitorál (STAE) iha Rejiaun Administrativa Espesiál Oé-Cusse Ambeno (RAEOA), segunda ne’e hahú halo prosesu verifikasaun ba buletin votu ne’ebé simu hosi nasionál.
Diretóra STAE RAEOA, Luiza da Costa, hatete, prosesu verifikasaun ne’e sei hala’o durante loron haat, hahú segunda 14 to’o 17 marsu, ne’ebé hetan seguransa hosi PNTL no observa hosi Komisaun Nasionál Eleisaun (CNE, sigla portugés) no hetan akompaña direita hosi responsável kandidatu na’in-16 iha rejiaun ne’e.
“Tuir lista ne’e simu hosi nasionál hanesan buletin votu hamutuk kaixa 21, ho totál livru iha laran hamutuk 1.166, no kada livru folla 50, karik durante loron haat halo verifikasaun iha livru balu la to’o, nakles, kuak ka tinta kona, parte STAE sei koordena ho responsável kandidatu atu tau karimbu la uza ka mekanizmu seluk tuir konkordánsia,” Luiza da Costa, ko’alia iha salaun Alfándega, Palaban, Oé-Cusse.
Nia fó-sai katak, materiál sensitivu no la’ós-sentivu ho pakote, transporta hosi nasionál to’o Oé-Cusse iha loron sábadu, tuku 6:00 liuhosi ro Berlin Ramelau, ho totál no kuantidade mak hanesan; urna hamutuk 247, kabina votu kuantidade 300, selus kuantidade 2,400, tinta indelivél 352.
Nune’e mós stiker kódigu sentru votasaun 264, buletin votu, akta operasaun estasaun votasaun 88, akta operasaun sentru votasaun 60, akta rezultadu sentru votasaun 1.020, lista votante 352, lista adisionál 88, lista funsionáriu votu 88 no lista prezensa ofisiál monitorizasaun 88.
Nune’e mós lista fiskál vota 88, lista prezensa observadór 88, lista prezensa fiskál 60, lista prezensa fiskál apuramentu munisípál ida, formuláriu termu entrega materiál 188, formuláriu termu entrega urna 60, termu entrega akta rezultadu sentru votasaun 60.
Livru formuláriu reklamasaun 88, deklarasaun segredu 88, folla aviza 176, kódigu sentru votasaun 60 no kódigu estasaun votasaun 88, envelope akta operasionál sentru votasaun 60 no envelope akta operasionál estasaun votasaun 88, envelope la-uza 88, envelope kanseladu 88, envelope abandonadu 88, envelope nulu 60, envelope branku 60, lista prezensa profisionál komunikasaun sosiál 88.
“Transporte ita prepara ona karreta 36 komposta hosi karreta aluga 10, apoia hosi Governu 26, karik la to’o ita sei koodena tuir nesesidade ne’ebé iha, tanba iha loron sesta 18 marsu ita sei halo abertura atu desloka ba sentru votasaun 60 iha suku 18 no sub-rejiaun haat,” nia katak.
Entretantu, totál eleitór ne’ebé sei partisipa iha eleisaun prezidensiál 19 marsu 2022, iha RAEOA hamutuk 51.495 komposta hosi mane 26.232, feto 25.263, ho totál sentru votasaun 60 no estasaun votasaun 88, ne’ebé sei envolve brigadista na’in-60 no ofisiál eleitorál na’in-880.
Jornalista : Abílio Elo Nini
Editór : Evaristo Soares Martins
