BAUCAU, 14 marsu 2022 (TATOLI) – Sekretariadu Tékniku Administrasaun Eleitorál (STAE) Munisípiu Baucau, rejista eleitór na’in-360 ne’ebé sei vota iha Hospital Referál Eduardo Ximenes (HoREX).
Diretór STAE Munisípiu Baucau, Lúcio Freitas Salvador, hateten, sentru votasaun iha Eskola Ensinu Bázika Sentrál (EBS), Vila Nova no estasaun votu movel ida iha HoREX tanba atu atende eleitór internadu hamutuk na’in-240 inkluidu pesoál saúde sira-ne’ebé hala’o serbisu iha loron eleisaun hamutuk na’in-120 nune’e tótal eleitór movel hamutuk na’in-360.
“Ita iha estasaun votu ambulante hamutuk ida de’it mak iha HoREX tanba atu atende eleitór ka pasiente sira-ne’ebé halo tratamentu iha ospital,” nia informa Agência Tatoli iha Vila Nova, segunda ne’e.
Kritéria ne’ebé presiza mak eleitór internadu tenke iha kartaun eleitóral no antes loron-10 eleisaun, lista eleitór hirak-ne’e tenke submete ona ba STAE.
Lúcio esplika, to’o tempu eleisaun, ofisial eleitóral sira sei lori buletin votu inklui urna ne’ebé sei akompaña hosi fiskál, observadór ba direita ospital atu pasiente sira ezerse sira-nia direitu votu.
“Ofisiál eleitorál sira treinadu, sira iha mekanismu di’ak atu atende prosesu eleisaun iha ospital,” Lúcio akresenta.
Bainhira remata vota, urna sei transporta fali ba sentru votasaun EBS, Vila Nova atu kontinua halo kontajen.
Jornalista : Natalino Belo
Editór : Evaristo Soares Martins
