BAUCAU, 15 marsu 2022 (TATOLI) – Servisu Agrikultura no Peska Munisípiu Baucau liuhosi Diresaun Reflorestrasaun distriubi ai-oan hamutuk rihun 31 ba komunidade hodi kuda iha postu administrativu Baucau vila, Laga, Quelicai no Venilale.
Koordenadór Reprezentasaun Territoriál Refloresta, Plantasaun no Indústria Munisípiu Baucau, Pasqual Afonso Belo, hateten, parte floretrál iha tinan 2022 prepara ai-oan hamutuk rihun 70 ne’ebé sei distribui ba komundade sira, liuliu iha área foho-lolon hanesan parte prevensaun ba dezastre naturál.
“Komunidae ne’ebé presiza ai-oan bele hakat mai floresta atu foti ai-oan atu kuda,” nia ko’alia iha Vila Nova tersa ne’e.
Objetivu hosi kuda ai-oan mak hametin ekolojia, aumenta oksijéniu tanba bele fó protesaun ba rai hodi prevene dezastre naturál no ba futuru iha valór ekonómika ba komunidade hanesan utuliza ba nesesidade privadu.
Ai-oan ne’ebé distribui liuhosi viveiru ne’ebé hala’o hosi grupu komunitária iha postu administrativu haat hanesan Baucau Vila hamutuk rihun 20, Laga rihun 20, Quelicai rihun 20 no Venilale rihun 10.
Hosi viveiru ne’e MAP sei distribui komunidade sira iha postu admistrativu neen depende ba pedidu hosi komunidade.
“Foin daudaun ita distribui ona ba postu Venilale, Vemasse, Baucau Vila, Laga no Quelicai hamutuk rihun 31. Enkuantu Baguia no Vemasse seidauk tanba laiha pedidu hosi komunidade,” Pasqual hateten.
Ai-oan ne’ebé prepara mak hanesan mahoni, ai-kakeu, ai-kameli inklui aihoris seluk hanesan ai fuan ba konsumu.
Jornalista : Natalino Belo
Editór : Evaristo Soares Belo
