DILI, 16 marsu 2022 (TATOLI)—Governu liuhosii reuniaun Konsellu Ministru (KM), kuarta ne’e, diskute no aprova Projetu Rezolusaun Governu, kona-ba akordu entre Governu Timor-Leste no g7+.
Projetu rezolusaun Governu ne’e aprezenta hosi Vise-Ministru Negósiu Estranjeiru no Kooperasaun (MNEK), Julião da Silva.
“Akordu ne’e ho objetivu atu kontribui ba atividade sira g7+ nian, Governu fó entre tinan 2022 to’o 2027, ho montante millaun $1 kada tinan,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu, kuarta ne’e.
Notísia relevante: g7+ agradese ba PM Taur
Nune’e, subsídiu ne’e tenke uza ba promosaun kooperasaun entre Estadu-membru no ba finansiamentu despeza funsionamentu g7+ inklui ba organizasaun reuniaun ministeriál anuál.
Jornalista : Antónia Gusmão
Editora : Julia Chatarina
