iklan

HEADLINE, SEGURANSA

PNTL halo identifikasaun ba joven na’in-rua ne’ebé atake sede CNRT

PNTL halo identifikasaun ba joven na’in-rua ne’ebé atake sede CNRT

Komandante PNTL munisípiu Dili, Superientendente Xefe Polisia, Henrique da Costa. Imajen TATOLI/Francisco Sony

DILI, 16 marsu 2022 (TATOLI)— Komandu Polisia Nasionál Timor-Leste (PNTL), munisípiu Dili halo ona identifikasaun ba joven na’in rua ne’ebé hala’o provokasaun no atake sede partidu Congressu Nacional Reconstrução Timorense (CNRT) hodi rezulta mós ema na’in-ida kanek iha parte ulun.

Komandante PNTL Munsípiu Dili, Superintendente Xefe Henrique da Costa, informa daudaun PNTL halo identikasaun ba joven nain rua ne’ebé halo ataka ba sede sentrál partidu CNRT iha bairru Grillos-Dili, maizumenus tuku 17:00, lokoraik ne’e.

“Loos duni ohin lokoraik ne’e iha joven nain-rua uza motór mak ba halo provokasaun iha sede sentrál Partidu CNRT nian, maibé liu tiha minutu balun, membru polisia ne’ebé halo patrolla iha área refere konsege lori kedan joven na’in rua inklui evidénsia motór rua ba iha Eskuandra Nain Feto hodi halo identifikasaun,” Komandante Henrique da Costa, hateten ba Agência TATOLI via telefónika, kuarta kalan ne’e.

Motivu hosi kazu ne’e, nia dehan  iha provokasaun, maibé parte PNTL seidauk hatene motivu loloos hosi kazu ne’e rasik tanba sei iha hela prosesu identifiksaun.  

Tanba, PNTL iha eskuadra Na’in-Feto halo hela identifikasaun ba joven nain-rua  durante oras 12 nia laran.

“Agora dadaun ita halo identifiksaun ba joven nain rua ne’e, hafoin ida ne’e mak ita halo detensaun ka husik fila-fali depende ba kazu ne’e,” nia akresenta.

Nune’e, PNTL mós seidauk hateten joven-nain rua ne’e nia identidade ka mai hosi apoiante kandidatu Prezidente Repúblika ne’ebé nian tanba sei iha prosesu identifikasaun.

“Ha’u mós seidauk hatene loloos ema nain-rua ne’e nia identidade, ha’u hanoin aban mak ita ko’alia, nune’e imi bele hetan informasaun ho klaru,” nia akresenta.

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!