STAE Bobonaro rekoñese urna monu iha Tunubibi
BOBONARO, 16 marsu 2022 (TATOLI) – Diretór Sekretariadu Tékniku Administrasaun Eleitorál (STAE) Munisípiu Bobonaro, Mariano Viegas Amaral, rekoñese urna monu iha área Tunubibi, suku Tapo-memo, postu administrativu Maliana, maibé mamuk hela.
“Hakarak informa ba públiku katak informasaun ne’ebé espalla iha mídia sosiál dehan urna monu duni, ami rekoñese iha parte Tunubibi monu ida ho matan, maibé mamuk hela, tanba ita-nia kondutór sira kesi de’it ho tali-rafia la metin mak monu, maibé la’ós ho buletin, tanba bainhira buletin votu kuandu sai hosi fatin ida ba fatin seluk sempre hetan seguransa hosi PNTL,” nia ko’alia iha Maliana, kuarta ne’e.
Totál urna ne’ebé STAE Bobonaro hetan hosi nasionál hamutuk 450. Métade hosi númeru ne’e transporta hamutuk ho materiál sensitivu sira iha loron 11 marsu semana kotuk. Maibé tanba materiál barak-liu no kestaun limitasaun transporte balun tenke rai iha edifísiu STAE nasionál.
Materiál eleisaun prezidensiál ne’ebé hetan distribuisaun hosi nasionál mak hanesan materiál sensitivu kompostu hosi livru 1.584, buletin votu 79.200 hamutuk kaixa 28, karimbu no tinta.
Purtantu materiál la’ós-sensitivu mak hanesan, kaixote, akta rezultadu eleisaun, fomuláriu reklamasaun, pasta plástiku, fita no stop map.
Nia dehan, urna ne’e horisehik kondutór na’in-tolu ba foti iha Dili mai halo pakotementu ho materiál sensitivu sira.
“Agora informasaun balun sai dehan iha 15 marsu mak monu ne’e laloos, tanba ami halo verifikasaun ba buletin ne’e hahú loron 12 marsu remata loron 14 marsu, inklui hotu sira fiskál partidu nia no ekipa susesu kandidatu na’in-16 nian no hetan supervizaun husi CNE no observadór internasionál, ne’ebé ida-ne’e laiha impaktu negativu tanba ne’e la’ós materiál sensitivu,” nia afirma.
Diretór Komisaun Nasionál Eleisaun (CNE, sigla portugés) Munisípiu Bobonaro, Juvito Ramos, esplika, kualkér materiál eleisaun prezidensiál ekipa supervisaun sempre akompaña, maibé iha distribuisaun urna mamuk sira-ne’e parte CNE la akompaña tanba ne’e konsidera la’ós-sensitivu.
“Karreta ida horishik halo transportasaun materiál ne’e, STAE husu apoiu hosi administrasaun munisípiu nian ba foti urna mamuk sira tanba iha momementu realiza serimónia distribuisaun ita la konsege foti hotu, ne’ebé loos duni urna monu tanba dalaruma kesi la metin kondutór halai ho velosidade maka’as, ema tuur iha kotuk laiha entaun bele monu, maibé ne’e materiál la’ós-sensitivu,” nia katak.
Daudaun ne’e STAE Bobonaro halo hela prosesu pakotementu ba materiál senstivu no la’ós-sensitivu sira atu nune’e bele finaliza iha tempu badak no loron 18 marsu dadeersan halo ona serimónia distribuisaun ba iha sentru votasaun 130 no estasaun votu 150 ne’ebé mak estabelese iha postu administrativu neen munisípiu ne’e ho karreta estadu hamutuk 43 hetan seguransa másima hosi komandu PNTL munisípiu Bobonaro.
Jornalista : Sérgio da Cruz
Editór : Evaristo Soares Martins
