Autoridade Bobonaro enkoraja komunidade ezerse direitu votu iha loron eleisaun
BOBONARO, 17 marsu 2022 (TATOLI) – Sekretáriu Autoridade Munisípiu Bobonaro, João Fátima do Carmo, enkoraja komunidade sira-ne’ebé atinje ona idade 17 ba leten partisipa iha eleisaun prezidensiál ne’ebe sei realiza iha loron 19 fulan-marsu tinan 2022.
Nia dehan, atu komunidade sira entusiazmu partisipa iha festa demokrasia ne’e presiza kontribuisaun hosi líder komunitáriu, veteranu atubele konvida inan-aman, joven no ema hotu ne’ebé iha ona kartaun eleitorál bele ezerse direitu sívika iha festa demokrasia ne’e.
“Ha’u husu ba ita-nia komunidade iha suku 50, postu administrativu neen imporante liu mak iha loron 19 marsu, tuku 7.00 hotu-hotu ho entusiazmu bele ba partisipa iha festa demokrasia hodi ita ezerse ita-nia direitu nune’e hili ita hotu nia Prezidente Repúblika foun ba períodu 2022 to’o 2027 tanba tinan lima dala-ida,” nia ko’alia iha salaun administrasaun munisípiu Bobonaro, kinta ne’e.
Nia dehan, povu hotu-hotu iha direita absoluta atu fó konstribuisaun ba demokrasia Timor-Leste liuhosi eleisaun, maibé importante liu mak ema idak-idak tenke iha maturidade morál hodi garante pás no establidade iha sentru votasaun no estasaun votu.
“Festa demokrasia ne’e konserteza iha ida manán no mós sei iha lakon, bele hamosu mós insatisfasaun balun, maibé ida-ne’e normál tanba ida-ne’e mak demokrasia,” nia katak.
Autoridade ne’e husu ba Polísia Nasionál Timor-Leste (PNTL) Munisípiu Bobonaro atu halo seguransa rigór hodi atua individu ka grupu sira-ne’ebe hakarak kria instalblidade iha loron eleisaun nune’e povu hotu bele moris ho hakmatek.
Munisípiu Bobonaro iha sentru votasaun 130 no estasaun votu 150. Númeru ne’e kompostu hosi postu administrativu Atabae iha sentru votasaaun 13 no estasaun votu 15. Balibo iha sentru votasaun 20 no estasaun votu 24.
Iha postu administrativu Bobonaro iha sentru votasaun 40 no estasaun votu 44. Postu administrativu Cailaco sentru votasaun 15 no estasaun votu 16. Iha parte postu administrativu Lolotoe iha sentru votasaun 15 no estasaun votu 15 no postu administrativu Maliana iha sentru votasaun 28 no estasaun votu 36.
Notisia relevante: STAE Bobonaro verifika ona buletin votu kaixa 20
Jornalista : Sérgio da Cruz
Editór : Evaristo Soares Martins
