iklan

BAUCAU, HEADLINE, MUNISÍPIU, SEGURANSA

Deskoñesidu tuda bís Viqueque rezulta ema ida kanek

Deskoñesidu tuda bís Viqueque rezulta ema ida kanek

Bís ne’ebé asalta hosi ema deskoñesidu iha área suku Gariuai, munisípiu Baucau. Imajen espesiál.

BAUCAU, 17 marsu 2022 (TATOLI) – Ema deskoñesidu tuda bís Uailaca diresaun Dili-Uatulari, munisípiu Viqueque iha área suku Gariuai, postu administrativu Baucau Vila ne’ebé rezulta ema ida kanek.

Xefe Suku Gariuai, Arlindo Belo Freitas, esplika, insidente refere akontese purvolta oras 00:00 kalan, iha Igreja Gariuai nia oin ne’ebé rezulta janela bís parte loos rahun no vítima na’in-ida kanek kmaan tanba vidru janela kona.

“Na’in-ida mak kanek tanba bainhira tuda bís ne’e vidru janela rahun maibé kmaan,” Xefe suku Gariuai informa ba Agência Tatoli liuhosi telefónika, kinta ne’e.

Autoridade suku rasik husu tuir ona informasaun ba komunidade iha fatin akontesimentu maibé maioria informa akontesimentu refere komunidade lahatene tanba iha oras dekansa nian.

“Ita tenta atu buka tuir nafatin,” Arlindo hateten.

Autoridade suku Gariuai akresenta durante ne’e Komandu Polisía Nasionál Timor-Leste (PNTL) munisípiu Baucau, hala’o patrollamentu maibé insidente hanesan ne’e mosu iha kalan boot bainhira komunidade deskansa ona.

Komandante PNTL Munisípiu  Baucau, Superintendente António de Sá, simu ona informasaun kona-ba insidente ne’e maibé sei buka-tuir autór ne’ebé asalta bís Viqueque ne’e.

“Kuandu iha ona relatóriu komandu sei buka-tuir autór sira, ita presiza rona loloos lai informasaun hosi komandante eskuadra no Ofisiál Polísia Suku (OPS),” Komandante PNTL Baucau hateten.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!