DILI, 17 marsu 2022 (TATOLI)— Komandu Polisia Nasionál Timor-Leste (PNTL), Munisípiu Dili liuhosi Eskudra Nain-Feto detein ona joven na’in-rua ne’ebé halo provokasaun no atake sede Sentrál Partidu Kongressu Nasionál Rekonstrusaun Timor-Leste (CNRT,sigla Portugés), iha kuarta (16/03), tuku 18:30, rezulta joven na’in-ida hetan kanek iha parte ulun.
Komandante Polisia Nasionál Timor-Leste (PNTL), Munsipiu Dili, Superintendente Xefe, Henrique da Costa, informa, hafoin PNTL Eskuadra Nain-Feto halo tiha identifikasaun ba joven nain-rua no deside kedan halo detensaun bai ha sela Eskuadra Nain-Feto nian.
“Ita nia polísia Eskuadra Nain-Feto finaliza ona identifikasaun ba joven nain-rua ne’e no deside kedan halo detensaun hodi kontinua halo investigasaun,” Superintendente Xefe, Polisia Herique da Costa, hateten ba Jornalista sira iha Kuartél Jerál PNTL-Caicoli, kinta ne’e.
PNTL seidauk bele hateten joven-nain rua ne’e nia identidade ka mai hosi apoiante kandidatu Prezidente Repúblika ne’ebé nian tanba sei iha prosesu investigasaun.
“Ita seidauk suspeita joven nain-rua tanba daudaun sei kontinua halo investigasaun. Nune’e ha’u seidauk hatene joven nain-rua,” nia akresenta.
Nia hatutan: “Ha’u sei hein relatóriu finál investigsaun ne’e, hafoin mak ha’u fó sai kompletu ba ita bo’ot sira,” nia akresenta.
Notísia relevante: PNTL halo identifikasaun ba joven na’in-rua ne’ebé atake sede CNRT
Jornalista : Natalino Costa
Editór : Florencio Miranda Ximenes
