Arsénio husu kandaditu PR na’in-16 simu rezultadu hosi povu ho domin
OÉ-CUSSE, 19 marsu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, husu ba kandidatu Prezidente Repúblika na’in-16 atu simu rezultadu eleisaun ho fuan boot no domin.
“Ha’u vota ona hili ita-nia prezidente ba povU Timor-Leste, maibé husu kandidatu-sira tenke fuan boot, manán ka lakon tenke simu ho domin, tanba povu mak deside nasaun ne’e nia destinu, importante kada kandidatu enkoraja militante no apoiante atu labele halo problema maibé kria pás no estabilidade, sé mak manán sei sai prezidente ba povu Timor-Leste,” Arsénio Bano, informa ba Agência Tatoli, hafoin ezerse diretu votu iha sentru votasaun Masin, suku Costa, OÉ-Cusse, sábadu ne’e.
Ezekutivu ne’e agradese ba Polísia Nasionál Timor-Leste (PNTL) tanba apoia órgaun eleitorál hanesan Komisaun Nasionál Eleisaun (CNE, sigla portugés) no ekipa Sekretariadu Tékniku Administrasaun Eleitorál (STAE) tanba situasaun la’o ho kontroladu.
“Ha’u mós kontente tanba Oé-Cusse situasaun la’o di’ak, povu Oé-Cusse matenek hakarak kontribui ba estabilidade iha ita-nia rai, ha’u hein katak iha Oé-Cusse sei laiha problema tanba la’ós foin mak hili nai ulun-sira maibé beibeik ona povu partisipa iha eventu demokrasia ne’e,” nia garante
Nu’udar prezidente autoridade, sei koopera ho xefe Estadu foun hodi serbisu ba povu Timor-Leste, nune’e dezenvolve programa prioridade ne’ebé povu presiza.
Prezidente RAEOA, Arsénio Paixão Bano ezerse nia direitu votu iha sentru votasaun Masin, aldeia Sanane, suku Costa, sub-sub-rejiaun Pante Makasar, iha oras tuku 1:30 lokraik.
Entretantu, totál eleitór ne’ebé sei partisipa iha eleisaun prezidensiál 19 marsu 2022 hosi RAEOA hamutuk 51.495 komposta hosi mane 26.232, feto 25.263, ho totál sentru votasaun 60 no estasaun votasaun 88, ne’ebé envolve brigadista na’in-60 no ofisiál eleitorál na’in-880.
Jornalista : Abílio Elo Nini
Editór : Evaristo Soares Martins
