iklan

BAUCAU, ELEISAUN, HEADLINE, MUNISÍPIU, POLÍTIKA

Povu Baucau husu PR foun garante pás no estabilidade

Povu Baucau husu PR foun garante pás no estabilidade

Sidadaun Baucau atuál Xefe Departamentu Komunikasaun no Kontrolu sosiál HoREX, Claudino Ximenes. Imajen TATOLI/Natalino Belo.

BAUCAU, 19 marsu 2022 (TATOLI) – Povu munisípu Baucau husu ba prezidente eleitu bainhira ukun estadu tenke garante pás no estabilidade nune’e Timor-Leste bele iha dezenvolvimentu ida ho signifikante.

Sidadaun Baucau atuál Xefe Departamentu Kontrolu Sosial Hospitál Referál Eduardo Ximenes Baucau, Claudino Ximenes, sente kontente tanba bele deside lÍder númeru ida iha órgaun soberanu estadu nian nune’e bele halo dezenvolvementu ba nasaun Timor-Leste.

“Prezidente Repúblika eleitu mai bele serbisu hamutuk ho entidade hotu hodi rona povu nia lian, oinsá mak bele serbisu hamutuk ho governu, sosiedade sivíl atu kria pás, estabilidade no unidade hodi halo dezenvolvementu ba povu,” Claudino hateten iha Vila Nova, sábadu ne’e.

Profesionál saúde ne’e akresenta, povu iha área rural seidauk asesu ba saúde, liuliu infraestrutura hanesan postu saúde, aumenta pesóal saúde no estrada tanba labele fasilita povu bainhira hetan moras.

Eis Administradór Munisípiu Baucau, Luis Aparício Guterres. Imajen TATOLI/Natalino Belo.

Eis Administradór Munisípiu Baucau, Luis Aparício Guterres hateten, povu hili kandidatura Prezidente Repúblika bazea ba programa, vizaun no misaun durante períodu kampaña tanba ne’e povu hein prezidente eleitu bele halao duni kna’ar nu’udar xefe estadu tuir espetativa povu nian.

“Liuliu pás iha ita-nia rain, atu bolu turista no investidór sira, dahuluk ema haree uluk estabilidade, ne’e mak importante,” Luis Aparício Guterres nu’udar komunidade Baucau akresenta.

Biban hanesan, Prezidente Komunidade Musulmanu Baucau, Samsul Bahri Ribeiro, hateten Timor-Leste nasaun foun, tanba ne’e presiza prezidente ne’ebé labele lori sofrimentu ba povu no sai prezidente ba povu tomak.

Prezidente Komunidade Musulmanu Baucau, Samsul Bhari Ribeiro. Imajen TATOLI/Natalino Belo.

Prezidente Repúblika tenke halo kna’ar tuir konstitusaun no tenke fó importánsia ba ema kbiit la’ek sira nune’e bele asesu ba edukasaun, ekonomia no saúde.

“Inportante liu mak instala embaxada rai-liur hodi hametin relasaun external ne’ebé lori benefísiu ba nasaun,” Samsul argumenta.

Jestór Restaurante Amalia Baucau, Agostinho da Costa hateten, nu’udar sidadaun tenke ezerse direitu votu atu hili Prezidente Repúblika ba povu tomak no husu atu kandidatura na’in-16 atu respeita no simu rezultadu eleisaun ne’ebé hili demokratikamente hosi povu.

Jestór Restaurante Amalia Baucau, Agostinho da Costa. Imajen TATOLI/Natalino Belo.

“Prezidente Repúblika tenke neutru nune’e bele tau matan ba ami negosiante ki’ik sira-nia ezisténsia, liuliu iha situasaun normál nune’e bele buka moris ho livre,” Agostinho argumenta.

Observasaun Ajénsia Tatoli iha terenu nota, sentru votasaun iha Baucau Vila, hahú loke iha tuku 07:00 dadeersan no komunindade sira ho antusiazmu partisipa iha eleisaun prezidensiál.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!