Rezultadu apuramentu RAEOA, Horta hetan votu 19.323 reprezenta 51,58%
OÉ-CUSSE, 20 marsu 2022 (TATOLI) – Rezultadu apuramentu eleisaun prezidensiál hosi Rejiaun Administrativa Espesiál Oé-Cusse Ambeno (RAEOA), hatudu kandidatu Prezidente Repúblika José Ramos Horta, manán ho votu 19.323 (51,58%) hosi sentru votasaun 60 no estasaun votu 88.
Nune’e, hosi kandidatu 16 ne’e Francisco Guteres ‘Lu Olo’ hetan votu 11.216 (29,94%), Armanda Berta do Santos 2.213 (5,91%), Mariano Assanami Sabinu Lopes 1.975 (5,27%), Martinho Gusmão 974 (2,60%), Lere Anan Timur 686 (1,83%), Isabel Ferreira 330 (0,88%), Anacleto Ferreira 183 (0,49%), Virgílio Guterres 69 (0,18%).
Nune’e mós kandidatu Hermes da Rosa Coreia Barros hetan votu 32 (0,09%), Milena Pires 58 (0,15%), Felisberto Araújo Duarte 87 (0,23%), Constâncio Pinto 129 (0,34%), Rogério Lobato 86 (0,23%), Antero Bendito da Silva 68 (0,18%) no Angela Freitas 34 (0,09%).
Kontajen hosi ofisiál Sekretariadu Tékniku Administrasaun Eleitorál (STAE), iha RAEOA hahú halo apuramentu iha domingu 20 marsu, tuku 13:00 meodia no termina iha tuku 11:30 kalan, hodi rejista totál votante 50.649, totál eleitór ne’ebé mai vota 38.067 ho taxa partisipasaun 75,16%.
Totál rejista votu abandonadu (1), votu nulu 438 (1,15%), branku 133 (0,35%), reklamadu 31 (0,08%) no rejeitadu (1), nune’e totál votu válidu 37.463 (98,41%).
Tuir dadus hosi STAE RAEOA rejista eleitór partisipa iha eleisaun prezidensiál períodu 2022-2027 iha 19 marsu 2022, hamutuk 51.495, kompostu hosi mane 26.232 no feto 25.263, ho totál sentru votasaun 60 no estasaun votasaun 88, ne’ebé envolve brigadista na’in-60 ho ofisiál eleitorál na’in-880.
Nune’e mós durante realizasaun eleisaun iha rejiaun ne’e, hetan seguransa másima hosi PNTL hamutuk 172, no observa hosi Komisaun Nasionál Eleisaun (CNE, sigla portugés) hamutuk 88, observasaun internasionál Uniãun Europeia (UE), no akompaña direita hosi fiskál kandidatu na’in-16
Entretantu, totál eleitór ne’ebé rejista iha STAE ba munisípiu 12 inklui RAEOA hamutuk 852.500, komposta hosi munisípiu Díli (190.710), Ainaro (45.833), Aileu (33.603), Baukau (96.207), Bobonaro (70.283), Covalima (47.807), Ermera (82.714), Lautém (48.012), Liquiçá (50.987), Manatuto (35.603), Manufahi (40.825), Viqueque (58.421) no RAEOA 51.495.
Nune’e mós eleitór iha diáspora hamutuk 7.113, komposta hosi Austrália (1.487), Koreia Súl (1.277), Inglatera (2.229), Irlandia Norte (1.264), no Portugál 856.
Jornalista : Abílio Elo Nini
Editór : Evaristo Soares Martins
