BOBONARO, 21 marsu 2022 (TATOLI) –Ekipa responsável eleitorál munisípiu Bobonaro segunda ne’e, konklui ona kontajen votu hosi sentru votasaun 130, nune’e rezultadu apuramentu hatudu katak, kandidatu Prezidente Repúblika, José Manuel Ramos Horta manán ho votu 25,615 reprezenta 48,45%.
Sekretariadu Tékniku Administrasaun Eleitorál (STAE) munisípiu hala’o apuramentu iha loron sábadu 19 marsu, tuku 20:00 kalan no remata iha loron segunda, 21 marsu, tuku 11:30 ne’bé observa hosi fiskál kandidatu na’in-16 no observadór sira.
“Ita-nia rezultadu apuramentu dezde inísiu to’o agora hatudu katak kandidatu númeru sroteiu 14, José Ramos Horta mak primeiru luga ho votu 25,615,” Prezidente Apuramentu Munisípiu Bobonnaro atuál Diretór Sekretariadu Tékniku Administrasaun Eleitorál (STAE) Munisípiu Bobonaro, Mariano Viegas Amaral, fó-sai hafoin ramata apuramentu, iha salaun STAE.
Totál eleitór rejistadu hamutuk 70,283, votante na’in-54,332, votu abandonadu haat (0,01%) votu nulu hamutuk 1,133 (2,09%), votu branku 290, votu reklamadu 21 (0,04%), votu rejeitadu 13 no total eleitór válidu hamutuk 52,871.
Nune’e rezultadu apuramentu munisípiu hatudu katak kandidatu Fransisco Guterres ‘Lú Olo okupa segundu lugár ho votu 8.883 (16,80%), kandidata Armanda Berta dos Santos ho votu 6.132 (11,60%), Mariano Assanami Sabino Lopes ho votu 3.714 (7,02%), Anacleto Bento Ferreira ho votu 3.499 (6,62%), Tito da Costa Cristóvão ‘Lere Anan Timur’ ho votu 1.505 (2,85%), Hermes da Rosa Correia Barros ho votu 1.182 (2,24%).
Nune’e mos kandidatu sira-ne’ebé hetan votu menus hosi rihun ida mk hanesan Martinho Germano da Silva Gusmão ho votu 864 (1,63%), kandidata Isabel da Costa Ferreira ho votu 274 (0,52%), Felisberto Araújo Duarte ho votu 251 (0,47%), kandidata Maria Helena Lopes de Jesus Pires ho votu 228 (0,43%), Rogério Tiago de Fátima Lobato ho votu 221 (0,42%) no Constâncio da Conceição Pinto ‘Terus’ ho votu 211 (0,40%).
Entretantu kandidatu Virgílio da Silva Guterres ‘Lamukan’ ho votu. 127 (0,24%), Antero Bendito da Silva ho votu 84 (0,16%) no kandidata Maria Ângela Freitas da Silva ho votu 61 (0,15%).
Hafoin finaliza kontajen votu, tuku 14:00 ekipa responsável sira sei kontinua lori akta rezultadu apuramentu ba Komisaun Nasionál Eleisaun (CNE, sigla portugés) nasionál.
Iha ámbitu fó-sai rezultádu apuramentu munisípiu Bobonaro ne’e akompaña hosi Komisáriu CNE destakadu munisípiu Bobonaro, observadór internasionál hosi Uniaun Europeia, ofisiál supervizaun CNE, brigada STAE no diskál hosi kandidatu PR na’in-16 no hetan seguransa másima hosi Polísia Nasionál Timor-Leste (PNTL) munisípiu Bobonaro.
Jornalista: Sérgio da Cruz
Editór: Evaristo Soares Martins
