DILI, 25 marsu 2022 (TATOLI)–Kandidatu Prezidente Repúblika hosi Partidu Demokrtátika Repúblika Timor (PDRT), Anacleto Bento Ferreira, hateten tuir enkontru kuadru partidu nian iha kuarta (23 marsu) ne’e, PDRT prontu atu fó apoiu ba José Ramos Horta tanba rezultadu eleisaun hatudu kandidatu ne’e hetan votu barak ne’ebé posibilidade ba segunda volta.
“Konsidera konsisténsia ho vizaun hanesan mak ha’u ho kandidatu hosi partidu CNRT, José Ramos Horta, ne’ebé iha kapasidade promove diálogu no repozisaun orden demokrátiku konstituisionál ho nesesidade disolve Parlamentu Nasionál ho forma garante unidade nasionál, nune’e PDRT deside apoiu inkondisionál kandidatu José Ramos Horta iha eleisaun segunda volta,” Anacleto Bento Ferreira deklara liuhosi konferénsia imprensa iha sede PDRT, Fomentu, Dili, sesta ne’e.
PDRT prontu fó apoiu no mobiliza rekursu hotu no apela ba militante no simpatizante sira hotu atu bele fó apoiu ba José Ramos Horta hodi manán iha eleisaun segunda volta.
Kandidatu Prezidente Repúblika hosi Partisu CNRT, José Ramos Horta, agradese ba apoiu hosi PDRT no promete sei buka servisu hamutuk ho partidu hotu iha asentu parlamentár nomós laiha asentu Parlamentár, no mezmu Prezidente Repúblika laiha knar ba ezekutivu nian maibé sei koordena hodi ko’alia ho Governu haree ba dezenvolvimentu nasaun lori moris di’ak ba povu.
Horta sei haree estrátejia modelu kampaña iha eleisaun segunda volta ne’ebé ho apoiu mós partidu no eis kandidatu PR seluk inklui PDRT rasik fiar sei lori vitória ba nia kandidatura.
Enkuantu, tuir rezultadu apuratamentu finál provizóriu hosi Sekretáriadu Tékniku Administrasaun Eleitorál (STAE), hatudu kandidatu Prezidente Repúblika períodu 2022-2027, Anacleto Bento Ferreira, ne’ebé mai hosi kandidatu PDRT, hetan votu 13059 (2,02%), hosi totál votu válidu hamutuk 647.172 Iha territóriu nasionál.
Kandidatu PR hosi CNRT, José Ramos Horta ho votu 301481 (46,58%), Francisco Guterres Lú Olo ho votu 143408 (22,16%), Armanda Berta dos Santos ho vottu 56289 (8,70%), Lere Anan Timur ho votu 48959 (7,57%), Mariano Assanami Sabino Lopes ho 47008 (7,26%).
Kandidatru PR independente Martinho da Silva Gusmão ho votu 8485 (1,31%), Hermes da Rosa Correia Barros ho votu 7958 (1,23%), Maria Helena Lops de Jesus ‘Milena Pires’ ho votu 5335 (0,82%), Isabel da Costa Ferreira ho votu 4165 (0,64%), Felizberto Araújo Duarte ho votu 2615 (0,40%), Constâncio Pinto ho votu 2474 (0,38%), Rogéiro Lobato ho votu 2028 (0,31%), Virgílio da Silva Guterres ho votu 1685 (0,26%), Antero Beendito da Silva ho votu 1531 (0,24%) no Maria Ângela Freitas ho votu 692 (0,11%).
Notísia Relevante: CNE finaliza ona apuramentu nasionál
Jornalista : Nelson de Sousa
Editór : Cancio Ximenes
