BAUCAU, 29 marsu 2022 (TATOLI) – Prosesu programa merenda eskolár iha munisípiu Baucau sei hahú implementa iha inisiu fulan-abril tanba razaun mudansa kalendáriu.
Diretór Servisu Edukasaun Munisípiu Baucau, Augosto Ornai Ximenes, hateten, tuir kalendáriu, programa merenda eskolár hahú iha fulan-fevereiru maibé tanba mudansa kalendáriu, tinan-ne’e autoridade munisipál aprova sei aprova uluk orsamentu loron 35 nian hosi totál loron-hitunulu iha programa merenda eskolár.
“Ami hala’o ona reuniaun ho dirijente eskola sira, ami halo tiha ona kalendarizasaun atu prosesu orsamentu hosi finansa munispál, lais liu loron 11 fulan-abríl ita hahú ona programa ida-ne’e,” Diretór Edukasaun Baucau hateten iha Vila Nova, tersa ne’e.
Razaun seluk implementasaun tarde tanba prosesu levantamentu dadus estudante tarde, eskola Katólika hamutuk sia iha Baucau hahú hikas programa merenda eskolár entaun presiza konta bankária.
Razaun seluk, tinan haat ba kotuk eskola Katólika sira la hetan merenda eskolár maibé tinan-ne’e Ministériu Administrasaun Estatál (MAE) autoriza hikas iha planu orsamentu 2022 nune’e prosesu tarde tanba eskola Katólika sira tenke prosesa fali konta bankária foun.
Totál orsamentu ba programa merenda eskolár tinan 2022 iha autoridade munisipál Baucau mai hosi fundu transferénsia públika hamutuk $ 714.187.
Enkuantu, totál eskola ne’ebé hetan benefisiáriu hamutuk 209, kompostu hosi eskola ensinu pre-primária 29, ensinu báziku públiku hamutuk 111 no ensinu báziku Katólika hamutuk 67 hosi totál estudante 32.307.
Jornalista : Natalino Belo
Editór : Evaristo Soares Martins
