iklan

JUSTISA, HEADLINE

Igreja Katólika TL estabelese Tribunál Eklesiástiku atende kazu sakramentu matrimóniu

Igreja Katólika TL estabelese Tribunál Eklesiástiku atende kazu sakramentu matrimóniu

Reprezentante Santa Sé iha Timor-Leste, Monseñór Marco Sprizzi ho Arsebispu Metropolitana Dili, Don Virgílio do Carmo da Silva, Virgílio da Silva Guterres, akomapaña hosi Vigáriu Judisiál Tribunál Eklesiástiku, Padre Graciano Santos Barros, no Ministru Justisa, Tiago Amaral Sarmento, hala’o lansamentu dahuluk Tribunál Eklesiástiku iha Lecidere,sesta 1 Abril 2022, Imajen Tatoli/Antonio Dasiparu.

DILI, 01 abríl 2022 (TATOLI)— Igreja Katólika iha Timor-Leste liuhusi  Arkedioseze Metropolitana Dili, Arsebispu Don Virgílio do Carmo da Silva SDB, hamutuk ho reprezentante Vatikanu iha Timor-Leste, Monseñór Marco Sprizzi, akompaña husi Ministru justisa, Tiago Amaral Sarmento, sesta ne’e, hala’o lansamentu ba Tribunál Eklesiástiku atu hala’o julgamentu ba kazu sakramentu matrimóniu sira ho nian baze lei direitu kanónika.

Estabelesimentu Tribunál Eklesiástiku arkiodioseze Metropolitana Dili hanesan tribunál primeira no segundu instánsia instituidu husi arsebispu dioseze Dili ho dekretu númeru protokolár 189/ch/IX/2019, ne’ebé hetan aprovasaun husi tribunál supremu Vatikanu ho asinatura apostólika ho dekretu protokolár numeru 3435/21 SAT, loron 7 fulan dezembru 2021.

Vigáriu Judisiál Tribunál eklesiástiku arkedioseze Metropolitana Dili, Padre Graciano Santos Barros.Imajen Tatoli/Antonio Dosiparu

Biban ne’e, Vigáriu Judisiál Tribunál eklesiástiku arkedioseze Metropolitana Dili, Padre Graciano Santos Barros, informa katak objetivu estabelese tribunál eklesiástiku ne’e hodi atende nesesesidade espirituál sarani nian no mós halo julgamentu ba prosesu Eklesiástiku sakramentu matrimóniu ho baze kódigu direitu kanónika.

“Ohin ita abertura ba Tribunál Eklesiástiku atu ba oin Tribunál ne’e sei funsionál.  Tanba Tribunál ne’e  la’ós halo julgamentu ba kazu sivil ka kazu krime sira, maibé Tribunál ne’e iha relasaun ho sakramentu kazamentu ka matrimóniu sira ne’ebe maka hetan problema tenke rezolve iha  Tribunál Eklesiástiku,” Padre Graciano Santos Barros, hateten ba jornalista hafoin ramata sereóonia abertura dauluk ba Tribunál Eklesiástiku, ne’ebé maka  halo iha Kámara no eklesiástiku Lecidere, Dili.

Padre Graciano esplika Tribunál Eklesiástiku iha primeira instánsia no segunda instansia atu haree kazu matrimonial, nune’e sidadaun sira la lori ona kazu ne’e ba Tribunál Sivíl, maibé mai deit iha Tribunál Eklesiástiku.

Tuir planu Igreja Katólika Timor-Leste sei estabele Tribunál Eklesiástiku primeira instánsia iha Dili no Dioseze Baucau.

“Durante ne’e,  ita komprende kazu hotu ba Tribunál Sivil  mak halo julgamentu ba divórsiu, seidauk hateten katak nia iha veinkulasaun matrimóniu ne’e koree tiha ona tenke mai iha Tribunál Tribunál Eklesiástiku,” Vigáriu Judisiál ne’e esplika.

Tribunál Eklesiástiku mak sei halo julgamentu ba kazu sakramentu matrimóniu sira ho nian baze lei direitu kanónika.

Tanba Juís iha Tribunál Eklesiástiku bele mai hosi ema bai-bain no bele mós hosi ema leigu sira ne’ebé ho titúlu direitu kanóniku.

Iha biban hanesan, Arsebispu Metropolitana Dili, Dom Virgílio do Carmo da silva, afirma Tribunál Eklesiástiku ne’e estabelese ho esforsu no prosesu ne’ebé naruk, maibé ikusmai hetan aprovasaun husi Vatikanu hodi estabelese Tribunál Eklesiastika iha Timor-Leste.

Arsebispu Arkedioseze Metropolitana Dili, Dom Virgílio do Carmo da Silva SDB. Imajen Tatoli/Antonio Dosiparu

“Hahú prosesu ne’e iha tinan 2026 no konsege hetan aprovasaun husi Supremu Tribunál Eklesiastika iha Roma ne’ebé maka ohin ita halo ona abertura.  Tanba ne’e Ha’u agradese ba parte hotu liuliu Monsenór Marco Sprizzi”, Don Virgílio agardese.

Tribunál  ne’e nu’udar pedidu hosi Amu Papa Santo Padre nian ba iha Timor-Leste atu  iha duni  Tribunál Eklesiastika hodi fó asisténsia ba sidadaun ne’ebé hetan problema iha nia família.

Entretantu, Reprezentante Santa Sé iha Timor-Leste, Monseñór Marco Sprizzi, sente kontente ho estabelesimentu Tribunál Eklesiástiku ne’e, no nia husu juís sira atu administra servisu hotu ho di’ak hodi garante justisa ida ne’ebé loloos ba sarani sira.

Reprezentante Santa Sé iha Timor-Leste, Monseñór Marco Sprizzi .Imajen Tatoli/Antonio Dosiparu

“Liafuan Pastor ne’e atu servisu, ha’u hanoin liuhosi Tribunál ne’e, Juis sira bele serbí di’ak liutan povu kbi’it la’ek ne’ebé presiza ita nia tulun atubele fó asisténsia  ka bele fó solusaun ba sira nia problema ka kazu,” Monseñór Marco afirma.

Daudaun ne’e rekursu umanu ne’ebé iha kompostu husi juís na’in haat hanesan Padre Graciano Santos Barros, Monseñór José António da Costa, nune’e mós padre na’in rua sei hala’o estudu iha Roma-Itália no tinan oin finaliza ona.

Nune’e mós iha defensór vinkulu matrimoniál mós promotór justisa no espesialidade tenke iha kursu direitu kanóniku.

Partisipa iha seremónia lansamentu ba Tribunál Eklesiástiku, mak Ministru Justisa, Tiago Amaral Sarmento, Reprezentante Santa Sé iha Timor-Leste inklui Reprezentante Administradór Apostólika Baucau no reprezentante Bispu Dioseze Maliana no konvidadu sira seluk.

Jornalista: Natalino Costa

Editór     : Florencio Miranda Ximenes

iklan
iklan

Leave a Reply

iklan
error: Content is protected !!