DILI, 04 abríl 2022 (TATOLI)— Tribunál Distritál Dili (TDD), segunda ne’e, hala’o julgamentu kontinuasaun ba arguidu eis Prezidente Parlamentu Nasionál, Adérito Hugo da Costa, ne’ebé deskonfia komete krime furtu agravadu liuhosi dalan dada eletrisidade ilegál iha nia-uma Palapasu-Dili, iha tinan 2016.
Iha julgamentu kontinuasaun ne’e, Ministériu Públiku ne’ebé reprezenta hosi Prokuradór Rogério Viegas husu ba TDD atu aplika pena prizaun tinan rua no suspende ba tinan rua, tanba faktu no deklarasaun hosi sasin sira komprova katak arguidu komete ka prátika duni krime furtu agravadu ne’ebé previstu iha artigu 251 no artigu 252 hosi kódigu penál Timor-Leste.
Notísia relevante: Kazu Adérito Hugo, sasin deklara identifika fiu ne’ebé liga direta
Alende ne’e, MP mós konsidera kona-ba arguidu hala’o kooperasaun di’ak liu ho Ministériu Públiku no Tribunál Distritál Dili (TDD) hodi fó fila ka selu multa ho osan $2.000.
“Tanba ne’e, Ministériu Públiku husu ba Tribunál aplika pena prizaun tinan rua no suspende ba tinan rua ba arguidu. Tanba arguidu Adérito Hugo rasik koopera ho parte Ministériu Públiku no Tribunál hodi selu ona multa ho osan $ 2.000,” Rogeiro Viegas, deklara iha sala audensia julgamentu TDD, segunda ne’e.
Pokuradór Regério Viegas dehan razaun pena ida ne’e atu husu ba arguidu, karik tempu oin labele repete tan aktu halo ligasaun ilegál ba liña eletrisidade,
Iha sorin seluk, Defeza Arguidu nian, Pedro Aparicio, informa nia parte ladun konkorda ho alegasaun hosi Ministériu Públiku nian, tanba alegasaun hosi MP imputa ba nia kliente tanba faktu sira la sufisiente.
“Kazu ida ne’e, la’ós krime tuir prinsípiu legalidade hosi kódigu penál iha artigu 1 nian. Tanba ne’e husu Tribunál absolve tiha arguidu hosi krime ne’ebé Ministériu Públiku imputa ba arguidu,” Pedro Aparicio afirma.
Hafoin TDD rona tiha parte hotu, Juis prosesu Argentino Luíza Nunes, deside adia fali julgamentu ne’e ba iha loron kuarta (06/05), tuku 17:00, hodi foti desizaun ikus ba iha kazu ne’e.
Audénsia julgamentu ne’e, prezide hosi Juis kolektivu, Alvaro M. Freitas, Argentino Luiza Nunes, José Gonçalves, Ministériu Públiku reprezentua hosi Prokuradór Rogério Viegas no arguidu hetan asisténsia legal hosi Advogadu Privadu Pedro Aparicio.
Notísia relevante: PN autoriza deputadu Adérito Hugo hatán ba TDD iha 10 maiu
Jornalista: Natalino Costa
Editór : Florencio Miranda Ximenes
