BOBONARO, ELEISAUN, HEADLINE, IMAJEN, MUNISÍPIU, POLÍTIKA

AMB enkoraja populasaun partisipa eleisaun prezidensiál volta daruak

AMB enkoraja populasaun partisipa eleisaun prezidensiál volta daruak

Sekretáriu Autoridade Munisípiu Bobonaro, João Fátima do Carmo. Imajen Tatoli/Sérgio da Cruz.

BOBONARO, 05 abríl 2022 (TATOLI) – Autoridade Munisípiu Bobonaro (AMB) enkoraja populasaun idade 17 ba leten atu partisipa másima iha eleisaun prezidensiál volta daruak hodi hili xefe estádu foun ba mandatu tinan lima.

Sekretáriu Autoridade Munisípiu Bobonaro, João Fátima Barreto, informa tuir dadus hosi Sekretariadu Tékniku Administrasaun Eleitorál (STAE) eleitór ne’ebé elijivel hosi idade 17 ba leten ne’ebé iha kartaun eleitorál rejista hamutuk 70,283. Hosi númeru 379 vota iha sentru votasaun paralalu no totál votante 69,904.

Maibé hosi totál númeru ne’e rezultadu apuramentu munisípiu hatudu katak votante ne’ebé vota iha loron 19 fulan marsu hamutuk 54,332 kompostu hosi mane 27,676 no feto hamutuk 26,656. Hosi númeru ne’e mós iha eleitór 15,572 mak la konsege ezerse sira-nia direitu votu iha eleisaun liubá.

“Nu’udar autoridade munisípiu, ha’u husu ita atu vota dala-ida tán tanba festa ida-ne’e ita atu deside tuir konstituisaun katak Preizdente Repúblika hanesan órgaun ida ema primeiru ba ita-nia nasaun, ne’ebé presiza iha nafatin iha korajen atu fó tán kontribuisaun dala-ida tán ba kandidatu ida,” nia informa ba jornalista Tatoli, iha Maliana, tersa ne’e.

Nia apela ba populasaun sira hotu iha aldeia 192 suku 50 no postu administrativu neen kompostu hosi, Atabae, Balibo, Cailaco, Maliana, Bobonaro no postua administrative Lolotoe atu koopera ho autoridade seguransa nune’e bele garante festa demokrasia la’o ho situasaun pás no establidade.

Munisípiu Bobonaro iha sentru votasaun 130 no estasaun votu 150. Hosi númeru ne’e kompostu hosi postu administrativu Atabae iha sentru votasaun 13 estasaun votu 15, Balibo sentru votasaun 20 no estasaun votu 24.

Nune’e mós postu administrativu Bobonaro iha sentru votasaun 40 no estasaun votu 44, Cailaco sentru votasaun 15 no estasaun votu 16, Lolotoe sentru votasaun 15 no estasaun votu 15 no postu administrativu Maliana sentru votasaun 28 no estasaun votu 36.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!