EDTL presiza aumenta loja fa’an pulsa eletrisidade iha Cailaco
BOBONARO, 05 abríl 2022 (TATOLI) – Administradór Postu Administrativu Cailaco, Munisípiu Bobonaro, Alfredo Meta-dau, husu Eletridade Timor-leste, Empreza Públika (EDTL, E,P) aumenta loja fa’an pulsa eletrisidade ba komunidade sira iha postu administrativu refere hodi fasilita kliente sira.
Nia dehan, dezde instalasaun kontadór prepagu EDTL, EP foin kontrata empreza privada ida mak halo distribuisaun pulsa eletrisidade, maibé komunidade Cailaco hamutuk suku hitu ne’ebé hela ho distánsia do’ok labele asesu hotu tanba fa’an de’it iha merkadu Cailaco.
“Asesu ba pulsa ne’e mak fallansu boot ida tanba komunidade sira área Maumela no sira hosi suku Purugua ba to’o área Bilimau nian labele asesu hotu, entaun obrigatóriu sira tenke mai buka to’o merkadu laran, maibé distánsia ne’ebé dook tebes, entaun kestaun ida-ne’e EDTL presiza aumenta sé lae araska,” nia dehan ba jornalista Tatoli, iha Maliana, tersa ne’e.
Nia haktuir, durante ne’e empreza fornesedór ne’ebé fa’an pulsa iha Cailaco, dalaruma halo hela atividade iha natar tenke taka nia atividade negósiu durante loron ida ka loron rua tomak, nune’e bainhira pulsa hotu obrigatoriamente komunidade sira aguenta de’it iha nakukun laran.
“Espera iha tempu badak EDTL buka ona meiu ida loke konkutrsu atubele kontrata empreza ruma aumenta tán, atubele fornese pulsa ne’e kobre hotu komunidade sira,” nia katak.
Postu Administrativu Cailaco iha suku hitu mak hanesan, Purugua, Atudara, Meligo, Manapa, Daudu, Goulolo, Genulai no suku Raiheu ho totál populasaun 13,969 ho totál xefe família rihun tolu resin.
Jornalista : Sérgio da Cruz
Editór : Evaristo Soares Martins
