VIQUEQUE, 05 abril 2022 (TATOLI)–Polísia Nasionál Timor-Leste (PNTL) munisípiu Viqueque promete sei fó seguransa másima durante kampaña prezidensiál segunda volta.
“Ami (PNTL) kontinua halo preparasaun ba kampaña segunda volta no eleisaun sira hodi garante estabilidade iha munisípiu Viqueque. Ita daudaun preparadu asegura festa demokrasia,” Komadante PNTL munisípiu Viqueque, Superintendente Polísia, Sebastião Alves Quintão, hateten ba Agência TATOLI, iha ninia knaar fatin, tersa ne’e.
Komandu PNTL munisípiu Viqueque iha membru efetivu 142 no tama eleisaun hetan apoiu membru hamutuk na’in-25 hosi Komadu Jerál, Batalaun Orden Públika (BOP) Baucaun na’in-10.
“Daudaun ne’e ita halo ona alerta ba postu eskuadra lima hodi halo kontinuasaun no preparasaun ba eleisaun segundu volta, ita preparadu bazeia ba rekursu ne’ebé ami iha,” nia akresenta.
Notísia relevante: Eleisaun prezidensiál iha Viqueque la’o ho hakmatek
Nia dehan, dezafiu ne’ebé PNTL enfrenta liga ho sentru votasaun balun mak transporte labele asesu ba fatin balun no liña telkomunikasaun laiha halo susar halo komunikasaun, maibé parte seguransa sempre iha alternativa.
“Dezafiu ne’ebé ami hasoru iha loron eleisaun maka fatin sira ne’ebé transporte labele asesu, liuliu sentru votasaun sira. Aleinde ne’e ita haree área balun labele asesu rede telkomunikasaun, maibé ita nafatin buka maneira atu garante materiál sensitivu no naun sentivu lori to’o iha sentru votasaun. Preokupasaun ne’e la’ós iha Viqueque de’it,” nia hato’o.
Kona-ba transporte, foin lalais PNTL Viqueque hetan apoiu karreta unidade haat hosi komandu jerál hodi fasilita hala’o serbisu.
Nia informa, iha eleisaun dahuluk rejiaun ne’e rejista kazu rua ne’ebé suspeitu hamutuk haat, akontese iha postu Uatulari.
“Kazu hirak ne’e ladun grave no hosi kazu rua-ne’e ita aprezenta ona ba Ministériu Públiku hodi halo prosesu tuir lei,” nia realsa.
Biban ne’e, nia kongratula parte hotu iha munisípiu ne’e tanba eleisaun daudaun la’o ho di’ak tanba la rejista perturbasaun boot liu, hanesan iha fatin seluk.
“Ita iha munisípiu Viqueque tenke mantein nafatin situasaun kalma, ne’ebé situasaun kalma la’ós de’it polísia mak serbisu maka’as halo patrullamentu, maibé tanba konsiénsia hosi komunidade, ema la’o livre, laiha ameasa, no laiha intimidasaun hosi ema ida ba ema seluk. Ha’u husu nafatin ba líder partidu, líder arte-marsiál no joven sira atu fó apoiu nafatin ba autoridade seguransa hodi garante ba eleisaun segundu volta,” nia salienta.
Jornalista : Vitorino Lopes da Costa
Editora : Julia Chatarina
